Kum 1985 kum tharah Mizorama kohhran lian ber Presbyterian kohhran, Chanmari Biak ina inkhawm ho \hin chu Chanmari Preaching Station, tuna YMA Park chhak, Pu Vanlalsawma kawtah hian inkhawm hran a ni a, a kum lehah kohhran puitlinga hlankai niin, zawi zawiin tuna Biak in hmanlai mekah hian an insuan lut ta a.
Kum 1987 a lo inher chhuah meuh chuan Chanmari a\angin veng hrang kan lo ni tain ‘Chanmari West’ tih a lo ni ta a, (Vengdang tam takin an ngaihpawlh thin ‘Chanmari East’ tih a awm hran lo) hemi kum hian Village Council hran neiin V/C member turte pawh thlan nghal an ni a, chungte chu
President :Pu K Thantluanga
Vice President :Pu F Laltuala
Secretary :Pu R Vanchhunga (L)
Members :Pu Tlangramliana (L) Pu Pu Ropianga (L) Pu B Savunga
Pu Rozinga,(tunah chuan Chanmari Veng a ni tawh) Pu R Thangdailova.
Nominated seat : Pu Rongura (L)
Khatihlai khan tlak lampang zawng hi Chanmari West Area a ni a, hun kal zelah zawi zawiin ramri pawh siam danglam ni chho zelin tuna kan awm ang hi kan ni chho ta a, ramri depa awmte erawh chu an duhna zawk zawka lawi thei tura zalenna thui tak pek an ni.
Village Council hran hial kan lo neih takah chuan khatih laia Chanmari Branch YMA Executive committee rilruah pawh ‘YMA hi kan in\hen ve tawh mai dawn lawm ni?’ tih ngaihtuahna a lo awm faih faih a. Zankhat chu (kum 1988 kum tawp lam niin ka hria, ka mitthlaah a la cham reng mai) Pu Hrangbana (L) fapa Malsawma hi Executive committee member a ni a, an In-a kan committee \umin AOB-ah Branch YMA in\hen chungchang rawtna member \henkhat a\angin a lo ri chhuak a. Pu CH Rosanga (RIP) lo dingin, thinrim hmel \euh chungin “YMA Branch in\hen chungchang hi a sawi pawh sawi ri tawh reng reng suh u......” a ti ta piap piap mai a, sawizui chiah ngai lovin meeting Chairman-in a titawp zui ta nghal a, hun engemawchen chu Branch YMA in\hen chungchang thu chu a reh zui ta vang vang a, khatih hunlaia Branch hruaitute khan Branch in\hen kha kan hreh em atin ni.
Hun a lo kal zela, YMA pawh Branch pakhata awm reng chu remchan lohna a awm chho zel a, kha’ng hunlaia hruaitute khan hreh hle mah se kum 1989 kum tawp dawn lamah chuan “Chanmari Branch YMA hi Branch pahnih ah in\hen nise, ‘In dang’ tih \awngkam hman miah loh tur a ni....” tiin hreh tak chungin Branch pahniha in\hen thu chu lungrual taka passed a lo ni ta a.
Chanmari Branch YMA kha Section paliah \hen a ni a, kan Branch huamchhung hi Section pahnih niin Kawrpui chin chhimlam zawng hi Chawngbawla Section a ni a, hmar lam zawng hi Khuangchera Section a ni.
Kan Branch pahnih in\hen chungchang kha tuna kan member tam zawk hian kan hre phak kher lo ang a, a’n ngaihnawm mai mai khawp a. Executive committee meeting-ah bungraw insem dan tur chungchang ngaihtuah a lo \ul a, vengchhak lama lawi tur ten ‘vengthlang lam hi Branch thar chan chang tur an ni a, he’ng bungbel kan neih ang ang hi a tam zawk chang rawh se’ an ti a, keini lam Pu T.Bualzika, Tv R.Lalhmachhuana (Valtea) (nupui la nei miau hek lo) Pu Ramzauva te leh Pu Lianchhuna teho nen \angrual in ‘ni bik lo ve, a inzatin kan insem tur a ni’ tiin kan \ang ve tlat bawk a, bungrua kan neih ang angte chu a inzatin kan hai \hen phawk a, a in zatin kan insem ta a. (a tak takah chuan kan chan lam kha a tam zawk fein ka hria, Tv Lalzamliana Sailo te, Pu T.Lalhluna te leh Tv Zachungnunga teho khan kan chan lam kha a tlem ang tih hlau miau hek!!) Tin, khawih chet theih loh (Immoveable properties) chungchang kan ngaihtuah leh a. Khatih lai khan Pu Enga Sikul/Pu Hrangluaia Sikul (Chanmari P/S) kawmchhakah khian YMA Hall hmun tur lei laiin kan hnatlang \hin a, tuna Chanmari YMA Hall hmun hi an/kan la nei lo va. Committee chuan lungrual takin, initsikna leh inthikna tel hauh lovin tuna kan YMA Buk leh Pu Runa mual mawng zum lam, Sairang kawngchhak kan chang a, (Sairang kawngchhak a mi kha engtin nge ni ta zel ka hre lo) vengchhak lamin kan Hall hmun tur, Primary Sikul bul a mi an chang thung a. (Kha’ng hun lai hnaivai takah khan Vaivakawn Branch YMA atangin Kanan Br.YMA leh Hunthar Br. YMA an indang a, eng engemaw inchuhin thubuai an nei deuh ut ut nghe nghe a, keini lam inthen nen chuan in ang lo tak kan ni. {huat thu ah min lo lak sak lo hram sela}) Tichuan kum thar 1990 a\anga YMA Branch thar ding tur chuan kan inbuatsaih chho ta a ni.
Khawvel piantirh ata la awm ngai lo, Chanmari West Branch YMA chu a lo piang ta a, February ni 1,1990 zanah Middle School-ah kan Branch YMA Office Bearer hmasa ber turte chu inthlangin chu’ng kan thlanchhuah te chu:
President : Pu Lianchhuna
V. President: Pu T Bualzika
Secretary : Pu Ramzauva
Asst. Secy : Pu R Lalchhuanawma
Treasurer : Pu Vanlalsawma
Fin. Secy : Pu Ramtharnghaka (ani hi Chanmari huam chhungah a awm tawh)
Hun a inher chho zel a, mitthi neih nikhuain Darkhuang vuak \hin chu Information Mike-a puanin a thlak a, YMA Branch hranga kan awm hnu pawhin “Zualko intirh tawn tur em ni ang ?” tih ngaihtuah in Joint committee te kan han \hukhawm rap rap a, (kum 1991 kum laihawl vel niin ka hria) Jt. Comt. chuan “Mitthi kan neihin veng khat angin awmzui zel ila, zualko intir lovin Information Mike-ah inpuan tawnsak zel ni se” tiin lungrual takin thu a passed nghe nghe a.(tunlai angin telephone la awm hek lo, Mobile phone phei chu ka ha..!!) Eng thleng nge kan in puan tawn sak tak ka hre lo.
Chanmari Branch YMA-a kan awmho laite kha nimin ang mai la ni mah se, Silver Jubillee, kum 25-na lawm tur hialin kan in puahchah chho chu a ni ta reng mai a, a lunglen thlak zawnga ngaihtuah chuan a ngaihawm ve ta ngawt mai ti raw Pu Valte......?????