Ve khanglang a, in lo ti nghal mai ange. Khawnge kan thlasik nau kuah ve lawk teh ang. Chanmari West ah hian kum 10 vel awrh ka cheng ve tawh a, vei zawng han thai lang tur pawh ka ni ve in ka hria.
Chanmari West ah hian section hrang hrang Khuangchera Section, Taitesena Section, Chawngbawla Section, Vanapa Section, Neuva Section te awmin heng kan section hming put ho te hi mizo pa tlawmngai pasaltha hmingthang vek an ni a, an hnung hi kan zui ngei turah ka ngai a. A chhan chu kan section ah an hming kan put tir avangin tichuan kan veng bikah hian zunin khawlai a awm paruk a ni a, hengte hi a bul ami te theuh hian tihfai hna lo thawk mai tura beisei an ni.
Kan vengchhungah hian Electric Ban hi Khuangchera Section ah Ban ding zat 28 a ni a, Steet light hi 12 a in vuah. Taitesena Section ah Electric Ban ding zat hi 22 a ni a, Street Light 18 a in vuah a, Neuva Section ah Electric Ban hi 23 a awma, Strret Light 7 a in vuah bawk, Vanapa Section ah Electric Ban 37 a ni a, Street Light 25 a in vuah a, Chawngbawla Section ah Electric Ban 19 a awm a, Street Light 6 a in vuah bawk a. Hetiang hi kan venga electric chungchanga a lan dan chu a ni. Kan hotu lian leh veng chhunga veng hmangaihtu te kha khawiahnge in awm zawh tak le? Keini Ak zat 2 pawh ni ve lo tan chuan hmalak tum dawn mah ila a lo harsa thin si a, kan vengah hian street light ng ava tlem ve! Tichuan Chanmari West ah hian pawl ding neuh neuh te pawh kan awmve niin ka hria a. Chungte chu:
1. YMA, 2. CVTTP, 3. ZCC, 4. CWSC, 5. MHIP, 6. Mistiri Association 7. AMFU, 8. Pig Fed Assn, 9. Political Unit-te, 10. MUP, 11. BPL etc.
Heng pawl ho zawng zwngte hian kan vengchhung tan tangrualin he veng hian vantlang (Public) mamawh enge ni ang tih ngaihtuahin veng hmasawnna leh mamawh tur hi ngaihtuah ho thin ila, thla 3 danah joint meeting nei thin ila a van tha dawn em!
Khaw thenkhatah chuan Kohhran hrang hrang leh pawl hrang hrang te hian joint meeting an nei fo thin a sin.
Awle, ka vei zawngte hi a tha hle mai ti a tawp mai lovin zawm tlang theuh turin kan veng mipuite ka sawm a che u.
Tawngmang si lo maw Messi...!!
T-a
An khuaa pa hausa fapa ni ta se, Barcelona-in Spain-a pem a, football zirna hautak deuh maia lut tura an sawmna kha "Aw" a ti lo mai thei. Rosario khuaah eng youth team emaw tan a khel ang a, club lian takah a lut ang em tih zawhna lian tak a awm thei. Aizawl thleng thleng hian Lionel Messi kan ti kan ti lo mai thei ?
Mahse, kum 13 mi, Argentina kawr haa World Cup khelh tum, khawsak awlsam tawk lohna leh taksa lam natna benvawn nei mek Messi chuan a talent tipung turin a la hmuh ngai reng reng loh ram hla taka pem a thlang ta zawk a, nakkina chanvo tha a thlir avangin.
A thiante nen an tualzawlah an inkhel a, football player tha zawnga feh chhuak Barcelona chuan Argentina naupang talent nei tha tak inkhel lai an hmuhin khaw dang an hawi thei tawh lo. Naupang dang ang lo takin natna khirh takin a taksaah bu a khuar tih an hriat chian hnu pawhin, chu naupang atang chuan rangkachak khur an beisei tlat a, a chhiat theihna lai zawng zawng aiin a thatna tur an thlir len zawk avangin inhuamna sang tak nen an dawr ta a.
Spain-ah chhungkuaa pem an duh phawt chuan, La Masia (Barcelona academy, tunlaia football academy tha bera ngaih)-ah senso ngai lovin a inzir ang a, an chhungkuain hamthatna dang an dawn phah bawk ang.
Argentina naupang hi an lak theihna tur a nih phawt chuan Barcelona-in tangka leh thil dangah tanpui an intiam. Messi hian a thiante tawrh ve loh harsatna ruk a nei a, hetih hun lai hian naupang dangte anga tlawntlai tha taka sei lian a, puitling tura beisei ngam a harsa viau.
A taksa than lenna tur kawngah tlakchham a nei a, a than tithu thei natna a kawl reng. Professional footballer ni tura buatsaihtu a nu leh pate chuan an fapain a taksaah harsatna a nei tih an hre chiang em em a, hlauthawng taka nitina a che vel an thlir laiin, mi dang pawl pha lova a 'budelh' a nih mai chuan a hma lam huna khawthlir an neih zawng zawng kar lova boruakah a thamral dawn tih chu hrilh hriat hran an ngai lo.
An tan damdawi hmanga inenkawlna senso a hautak si a, hei tak mai hi Barcelona chawchah hnial harsa tawp chu a ni ta a ni. An hnena Messi a inzir a nih phawt chuan a thlawna zirtirna an pek bakah, damdawi thiam zawkte hmangin a taksa an enkawl ang a, senso zawng zawng club-in a tum vek ang tiin Messi mai ni lovin a nu leh pa an thlem tel nghal.
Khaw lian lem lo tak Rosario-a chhungkaw khawsak pangngai ve mai tan chuan Barcelona thlemna hnar chu thil harsa tawp a tling. Kum thum mi lek a nih lai atanga football nen inzawmna mak tak nei tawh; kum kaw mi a nih laia a thiante zinga ball a khalh kual vel dan mak leh thiam danglam bik em em mai chu; tuipui ralah chhungkhat laina pawh an neih lohna hmunah an pempui ta a, nakkina a chan tur an thlir avangin.
A lo puitling ta a; pa lian a ni lo; mahse, pa lian bula langsar a ni zawk. Awmkhauh tak, nghet tha zet, ke rang em em, a chep zawh poh leh a thiamzia hmuh fiaha awm thin; thlah fal vaih chuan hmeichhe awm tha duh lo ang maia pawi khawih hman ziah.
Goal khung thei bik; siam chhuak thei; ball pet thiam; ball tlanpui thei chungchuang; chan beh theih lova tei kual reng; khawi lai hmuna a awm pawha ngaihven ngai, hual beh avanga dan theih chuan loh, mi pakhatina bitum chi miah si loh; ball a chan tawha chhuhsak harsa em em, a chan loh laia tihnat ngawt chi ni bawk si lo.
Kum 24 mi, leh lam tana sahar hlawm; rang tak taka peta chak em ema tlanpui, inher leh chevel awlsam zet, ball nena lim kawi zawk zawk thin; mi nazawngin an la pet ngam lohna hla deuh hlek atang pawha a kuak hleka ri pawp hman; tlan laklawk eng ang pawh ni se nghak khawtlai lova hlauhawm taka pet mai thin; kang luaha chhuih khat em em a ni a, engtia ven chi tak ni ang maw ?
A inkhel en chakin Mizote pawh Kolkata thleng thlengin an chhuk a, football hrethiam tu fain nge a inkhel lai a hmuna en chak lo awm ang ? Argentina team-ah khawvela player tha mi dang pawh an awm vei nen, Bengali-ho ngat phei chuan amah chiah an buaipui.
An training lai pawhin ama che tla ringawt thla lain chanchin tharah an ti chhuak a, a thiante nen ball an inpek kual lai pawhin a chan ve leh an au dur dur. Khelmuala venhim hna thawktu police-te pawh an bang lo; inkhel tura a lo chhuah laiin an hna ngaituah lovin an cell-phone-in a hmaihmaah tak thla an laksak siah siah a, a bul lawka a thiante erawh tu mah an hre chang lo. Indian fan thenkhat phei chuan heti hian an sawi "Football Pathian" an ti.
Messi hian harsatna pakhat a nei; khawvela footballer ropui bera chhal dun Pele, Diego Maradona-te huanga dah harsa tihna chhan a la awm. Argentina tanpuia trophy lian pakhat tal a lak hun chuan khawvela ropui ber ang hiala sawi zui pawh a ni mai thei; a chhan chu hmabak thui tak la neia ngaih a ni a, eng nge thleng zel dawn a hriat loh.