Beiseina nen kan thlir thin a, beisei ngam mang lovin kan awm fo tawh.
Kum 10 fe a vei hnuin dinhmun thaah kan awm a, a vawrtawp thleng tur meuh chuan keimahni kan inen a, insitna lian tak kan nei. Kan theihna kawl kan iai lo thei lo va, kan neih rosum a beitham si; lak luhna mumal kan nei lo a, mi hausa tak min tuamhlawm mai tur hmel kan hmu bawk si lo.
Mahse, huaisen takin kan hruaituten hma an la a, miten an theih chu kan thei ang tih chu an thupui a ni. Kan thalaiten rilru sang leh rual elna tak tak an putna tur a ni a, ram pum huap khawthlir thar nei tura veng mipui kaihhruai theihna leh chawikanna tur niin an hria.
Buana hmaa kherh ngawt an duh lo va; senso a tam si Mizoram Premier League khel thei turin tling mah ila club kan enkawl zo lo ang tih ngaih dan leh kan thei em em ang tih chu kum kal ta atanga tun thlengin a la insual tawk viau mai thei.
Infiamnaah hian miten an duhthusam thin, an beisei ngam loh an puitlin fo mai. Rilru chhungrila tumna tak tak an neihte tihlawhtling tura theihtawpa an beihna rah a ni ngei ang. Ban phak loh khawih tumin an bei a, rinna nung nen hma lam an pan talh talh thin.
Tunhnaia khawvel huap infiamnaa thil thleng pakhat lek sawi mai mai ila. Kar hnih kal ta khan kum thum dawn tlankawnga pakhatna ni ngai tawh lo Yamaha rider Valentino Rossi chu Dutch Grand Prix-ah pakhatna a ni a, vawi sarih lai MotoGP world champion ni thei hi a lawm uchuak kher mai.
Kum 34 mi Rossi hian a hnua a sawi leh dan chuan “vawi tam tak pakhatna hi ka ni leh thei tawh lo a ni anga tiin ka inngaihtuah hman,” a ti. Tun pathianni tlaia Germany-a an tlan leh turah pawh chak thei a nihzia inhre chungin a tel dawn a, rilru leh thlarau thar nen a inlan dawn tih a sawi.
Kan sawi tum tak chu Mizorama football inelna sang berah kan veng kan tel tur hi a ni. Eng pawh ni se, kan hruaitute inhuamna a sang a, sum sen hautak lutuk karah kan veng tihmingtha turin an mawhphurhna an hlen chhuak ngei ngei dawn. Veng mipuite thlawpna tha an dawng a nih chuan ziaawm leh awlsam zawkin hmabak hautak an su tlang thei ang.
Tel ve hrim hrim ang tih lam an ngaihtuah lo. Sum avangin an duh ang player an nei lo na a, an neih angte tangkai taka hman tumin an bei a, club tantu mipuite tan mittlunga inlan ngei turin an inbuatsaih.
Mahse, a tha ber ni tur team kan nei nghal lovang tih a chiang a, a pawimawh ber phurna leh inrintawkna nei turin a thawhrimna phu ang thlawpna an mamawh. “Hei hian ka lo tang ve ang e” titu kan tam poh leh kan intinung tawn dawn tihna a ni a, chumi tur chuan mipuite an beisei a, inthlahrunna lian tak an neih avangin an sawi ring ngam lo.
Tlangval chhuanawm leh entawntlak
Zingkarah Chanchinbu sema inhlawh, Class kal loh nia inhlawhfa bawk, in chhung hna tul apiang thawh hreh nei ngai lo, kum 2013-a Mizoram University-in result a tihchhuahah B.A (Political Science)- a mark 572 hmu a, topper dinhmun thleng thei Tv Lalrinngheta hi a chhuanawmin a entawntlak tih loh rual a ni lo.
Lalrinngheta (Marina tia koh thin) hi May ni 10, 1992-ah Pu Lalrammuana leh Pi Zionpari te nupa karah a lo piang a, a naupanlai hun chu a pianna Biate khuaah a hmang. Gov’t P/S-I, Gov’t M/S-II leh Gov’t Eastern High School (Biate) ah te zirna bul rawn tan chhoin, HSSLC-ah kum 2010 khan Biate HSS atangin Mizoram-ah 10-na (Arts-ah) a ni.
Marina hi lehkha thiam thei tak tia sawi tur a ni hran lova, taimakna leh tumruhna nena tangkawpin tun dinhmun hi a thleng a ni. B.A (Final) a zirlai hian zan dar 12 thlengte lehkha a chhiar a, zing dar 3-ah te lehkha zir turin a tho leh thin. Kohhran leh KTP rawngbawlnaah a phak ang tawkin a tel reng a, Inkhawm a ngai pawimawh hle. A hunawl zawng zawng chu lehkha zir nan leh in chhung hna tul thawh nan a hmang thin.
Ama sawi danin “Heti ang dinhmun a thlen theih chhan ber chu a theih ang tawka a thawhrimna Pathianin mal a sawm a ni” Tunah hian Mizoram University-ah Master Degree zir chhunzawm a, Civil Service lama lut thei ngei tura inbuatsaih a tum bawk a ni.Heti ang mi Chanmari West Branch YMA-in member kan nei hi a ropuiin a chhuanawm tak zet a ni. Tunah hian Marina hi Vanapa Sect-ah a khawsa mek.