Miten "Ka hmangaih” an tih ang hi a ni ang em aw ? ka ti a, ka hnuk a tiulh ta fo mai. Hmangaih biathu han hlan ve ngawt dawn ila, engkhawkhaah min ngai lo emaw a ni awm si a... A thatzia te, a fuhzia te, a chungchuanzia te, entawntlak a nihzia te, ennawn fotlak a nih dan te, hmuh zina kan hriat hnem poh leh ka rilru an hneh dan te zep tlat tum mah ila, khawi khawiah emaw chuan thiam phak bak bakin mi dang rilru tur ngaihtuah miah lovin sawi leh vak a awl le.
Germany-ah Materema a awm a, chawlh hmangin a lo haw a, hriat chak em emin ka zawt a, min chhang a, min chhang miah lo. Dortmund khawpui bul lawk thingtlang khuaah an inkulh a, vawi khat mah Signal Iduna Park-ah a la lut lo tih min hrilh a, kei ni ila ka kal foin ka inring a, hetiang lamah hian Terema hi a van lo ler awm lo em em, zan rei deuh deuh thlengin tute emaw mobile phone-in a bia a be ve si a, ka ti rilru a, British sipai a nih avangin kal an phal lo miah bawk si lo.
Ka rilru luahtu ber ka sawi hmain, ka thinlunga hmun ril tak luah phak Borussia Dortmund chungchang ringawt pawh hi hnukulh teuha sawi tham a awm. Hria se la ropuina lal kha an khengbet lo tur tih ang deuhin, Terem-a hian hria se la, Signal Iduna Park-ah Dortmund inkhel a en ngeiin ka ring a, euro 15 chauhin a phur zual awm khawmna hmunah inkhel a en theih leh nghal. Stadium chhungah thutna 60,000 vel an siam bakah mi 25,000 chuangin ding chunga inkhel an en theihna tur an buatsaih a, mi dang pawi sawi lova an duh dan dana an khawsak an phalsak.
Tunlai coach zinga ngaihsanawm ber pawl Juergen Klopp chuan “Dortmund-ah chuan football hi sakhua a ni”, ti hialin a sawi a, chu chuan football boruak lenzia leh a taka temtuten nuam an tihzia a sawi fiah phak em kei chuan ka hre lo?
He khaw thenawm lawka awm Terema hnenah Dortmund hi khawvela football club zinga a hmuna inkhel entu ngah ber dawttu an ni a, Barcelona tih lovah chuan entu an tam ber. League an khelh apiangin chawhrualin mipui 80,000 chuang an pungkhawm ziah tih ka hrilh a, “E! en ve tawh tur a nih chu” a ti.
Ziaktu pakhat chuan “Germany-ah chuan football tak tak an khel a, football fan dik takten an en a, boruak lian leh nuam em em an chen a, khawvel hmun dangah Bundesliga boruak ang hi a awm ve lo,” a ti.
Bayern Munich chanchin ziak rawh min ti a, ka duh leh ngaihsan ber ka ziah hmain ka hmun neih a khat chu a ni ta der mai. Bayern hi khawvela football club tha ber a nih loh chuan pahnihna chu a ni miah lo vang tih hi ka ngaih dan a ni.
“Bayern hi football club a ni” tiin tawi tein sawi ila, ka rilruah chuan a fiah tawk. He club hian American emaw Russia emaw Arab mi hausa emaw a mamawh ve lo. Trophy leh sumdawnna, larna ringawt atchilhten enkawl ve lo mah se khelmualah an hlawhtling thei. Sum an nei a, player man to an lei thei a, hlawh tam tak an pe thei bawk. Kum tin player naupang chhawr thar an nei ziah a, player an siam lian reng a, kum tin hlep an nei thei cheu. Dawhthei takin football an bei a, kalphung tha a hlawhtlinpui theih tih khawvel hmaah chiang takin an pholang.
Bayern president ni turin billionaire nih a ngai lo va, mi hausa an mamawh lo. Germany tana football khel tawh, mi hmingtha, football khelh a chawlhsan hnua football kalsan zui lo; football ze ril ber leh nihphung hriate’n Bayern president nihna an chelh thin.
German player zinga ropui ber ang hiala an sawi thin Frank Beckenbauer-an president a nih atangin Bayern hi football fan-te ta a nihzia a chiang lehzual. A zawna kum thum (1974-76) European champion an nih laia Bayern player langsar Beckenbauer hi Karl-Heinz Rummenigge chuan thlakin Bayern president hna a chelh ve leh a, Bayern player hlui Rummenigge hi 1986 World Cup en phate chuan Germany tan a thawh hlawkzia an hmu ang.
Rummenigge hi Uli Hoeness chuan thlak ve lehin tun thlengin Hoeness hi Bayern president a ni a, 1974 World Cup champion West Germany team zinga mi niin tun season-a trophy lian pathum lakpuitu coach Jupp Heynckes nen hian German national team tan an khel dun thin. Inthian tha tak niin Heynckes hi a vanglaia striker tha tak a ni a, Bundesliga chanchina goal thun tam pathumna a la ni reng.
(Kan tum ber kan luhchilh hman ta lo va, Editor-in a phal leh hmangaihna chanchin hi kan ziah chhunzawm leh dawn nia)