Mizorama chawlh a rawn hman zawk chhungin, Mizo Footballer piang tawh zinga hlawhtling bera chhal ngam, Jeje Lalpekhlua kawmna hun tha tak mai ka nei thei hlauh mai a, hun tha min siamsaktu Pathian leh Jeje-a chungah lawmthu ka sawi e.
M = Mangheta, J = Jeje
M : I pian leh murna, in chhungkaw chanchin tlangpui nen?
J : 7.1.1991 khan Hnahthial khuaah ka piang a, unau paruk(6) zinga a naupang ber ka ni a, tunah hian ka nu leh pate’n Pathian zarah min la dampui.
M : Mizoram pawna inkhela ei zawnga i awm hma hian ram chhungah Major Tournament i khel hman em?
J : Kum 2006 khan Wai Wai Cup (MLA Constituency Tournament)-ah Hnahthial Constituency aiawhin ka khel a, khata tang khan Mizoram U-19 khel tura thlan ka ni a, a tawi zawngin sawi ta mai ila, National U-19 camp-a lut tura thlan ka ni ve leh a. Chumi zawhah tuna ka khelh mekna Pune FC hi kum 2007, November thla atangin ka zawm ta a ni.
M : Mizo Fottballer te’n a ram pawna an awm a harsatna an tawh ang chi hi i tawng ve em?
J : Pathian zarah tawk em em lovin tun dinhmun hi ka thleng a, Pathian hnenah pawh lawmthu ka sawi thin. “Lunglen” chang hi chu ka nei ve tho. Chawlh rawn hman a, kan hunpui lai, Krismas ruai theh ni ang tea kal a ngai thinte hi chu a hrehawm ve duh khawp mai.
M : Pune FC –a training in kalpui dan tawi fel deuhin min hrilh thei em?
J : Football season tan hma hian Pre-Season training kan nei a, he hun hi a hahthlak lai ber a ni a, zing leh tlaiah training chi hrang hrang kan nei thin a, season kan tan hnu hi chuan Fitness tha tawkah min ngai a, training pawh a hautak lutuk lo, mahse a inthlahdah theih miah loh a ni.
M : National Senior Team-ah Striker rinrawl i ni tawh mai a, Club lamah First Eleven chiang sa i ni em?
J : Hmun danga kan khelh dan hi an dah pawimawh lo khawp mai. Training kan kal that leh kal that lohte, training naa kan game a zirin min thlang ber. Tu mah hi “Chiang sa” kan awm lo.
M : Tuna i khelh mekna Pune FC-ah hian player eng zat chiah nge awm ?
J : Register player hi mi 33 kan awm a, I-League khel tur hian player 18 thlan chhuah thin a ni a, First Eleven mai ni lovin Jersey ha pha tur ringawt pawh hian kan bei nasa thei khawp mai. Kan inthlahdah ngam lo hrim hrim.
M : National Senior Team tan hian goal eng zat nge i khung tawh?
J : Goal 10 ka khung ve tawh a.
M : India ram pawn khawi ram nge Senior Team hminga i tlawh tawh?
J : Senior Team hming chuan West Indies, Trinidad & Tobago, New Guinea, Barbados, UAE, Qatar, Maldives leh Malaysia-ah te ka kal ve tawh a.
M : Rangers FC-a in zuk trial kha eng nge chanchin ni zui ta?
J : Kan trial period kha a rei lova, ni 5 chhung chauh kha a nia, Scottish League kal mek bawk nen khan hun a chep deuh va. Germany Club pakhat leh Rangers FC te Friendly match an khelh huna min khelh tir a, min enchhin an tum a, mahse Germany kal tur khan Visa kan hmu thei ta si lova, an tum ang khan thil a kal ta bik lo.
M : Chawimawina i dawn lam te?
J : Chawimawina sawi tham ka la dawng lo. 2006 ah U-16 Tournament-ah Top Scorer ka ni a, 2009-ah Pune FC bikah Young Player of the Year-ah min thlang a, 2011 khan National Level-ah Young Player of the Year ka ni bawk.
M : In hlawh lak dan kalphung lam te hi?
J : Club-a contract kan ziah hian Season tluana kan hlawh turah inremna kan siam a, chu kan inremna atang chuan 50% ang vel hi a hlawmin min pe nghal a, a bak 50% chu thla biin kan la tlangpui. National Team-a kan khelh hi chuan hlawh hranpa vak kan nei lo, Lawmman min pe ve chauh zawk.
M : Tun dinhmun i thlen theihna chhan hi eng nge ni bera i hriat?
J : Thiamna lamah chuan ka inchhuang lo khawp mai. Mizo palyer-ah chuan ka pumrua a te bik lova (5’8” leh 80 kg a ni e), khangte kha a tirah chuan min thlan chhan kha ni ta maiin ka hria. Mahse National U-19 Camp-a ka awmlai khan Football-ah ka Piangthar ka ti mai a, “Mi paw’n an theih chuan ka thei ve ang, engtikah emaw chuan National Senior Team-ah ka la tel ve ang” tih rilru ka pu ta a, ka bei nasa, ka insum a, ka thawkrim ve khawp mai. Ka dam phawt chuan practise ka thulh ngai lo va, ka kal tlai ngai lo bawk
M : Zuk leh hmuam, ruihtheih thilah Club-in a khuahkhirh che u em?
J : Professional kan ni a, mahni tana tha tur chu hre tura ngaih kan ni, Self-Discipline a pawimawh ber. Zu han in ve zeuhte hi chu an awm a; mahse, an rui ve ngai lo. Zial an zu meuh lo vek.
M : National Level thleng tur hian chance kan neiin i hria em?
J : Tehreng mai. Mizo chu kan skill a tha tlangpui. Chapona lam ni lo se, tun dinhmun thleng tura ka beih ang hian bei ve se, Mizo zingah hian kei aia thleng sang thei tur an tam lutuk. Chutih rual chuan tumruhna, insumtheihna leh taimakna kan tlachham thin erawh hi chu kan hlawhchham fona chhan a ni tih hriaiin, kan thawhrim erawh chu a ngai khawp mai.
M : Player te hian Coach-te hi an Team enkawl danah te, game plan-ah te, formation te in sawisel thin em?
J : Hmaichhanah chuan kan sawisel thiang lo a ni ber a, Coach-in khelh dan tur a tih ang a ka khelh theih loh chuan substitute-a awm ka hmabak a ni mai. Chuvangin Coach mittlung ngeia khel thei turin kan bei nasa thin khawp mai.
M : Ei leh in leh in hriselna hi?
J : Sa leh hmuihmer ei tam lo turin kan Club Doctor-te hian min hrilh tam khawp mai. Alu hian weight a siam a, kan ei nasa. Kan training-na hmunah Club Doctor-te hian min vil reng a, na (inhliam) kan neih chuan kan hrilh mai zel. Hliam leh na te hi zep ruk chi a ni lo, kan game-ah a lo lang a, kan tan bawk a pawi thin.
M : Hetia Professional Club-a khelh a National Senior Team-a khelh hi ilo suangtuah tawh ngai em?
J : Ka inkhelh tantirh chuan ka suangtuah pha bik lova. Mahse ka sawi tak ang khan National U-19 Camp-a ka awmlaia ka rilru ka siam khan nasa takin min pui a, kan Coach min fuihna kha ka chhawr khawp mai. Hei aia sang thleng zel tur pawh hian ka bei zel ang a, India ram pawn a khel thei tur khawpa beih ka la tum zawk asin.
M : A tawpna nan, YMA rawngbawlna leh kan Kristian-na hi eng nge i hmuh dan?
J : A ropui ka ti khawp mai. Kei chu ka inhman ve hmain tihian ram pawnah kan hun tam zawk chu kan hmang a ni ta mai a. Hnam dang zingah pawh Mizo nih tinuamtu a ni a. Sakhuana lamah hi chuan sawi tur ka nei tam lo. Mizo Kristian inkhawmnaah hian ka hman chuan ka kal ve thin a, mahse Pathianni te hi kan inkhelh hun a ni thin a, tel tam chu a har khawp mai. Mahse heti chung hian heng hlawhtlinna ka chan zawng zawng hi chu Pathian vang a ni tih erawh chu ka hria, ka lawm khawp mai.
M : Huntha tak min pe a, ka lawm e. I kal zelna turah duhsakna ka hlan a che.
J : Kei pawh ka lawm e.