Tunlai hian Inter Village Red Ribbon Football khelh mek a ni a, inkhel en a manhla in a hmuhnawm thei thin viau mai. Tunhma a la awm ngailo Zan lam a inkhel te kan hmu ta zel mai hi changkan na nasa tak a ni awm e. Hetihlai hian keini veng VC Team te chu kar kalta khan an tla tawh a, han chhut neuh neuh chuan khatiang ang players tha Lammual em pawh thleng lo a kan zuih ral mai kha inen chian kan ngai nasa hle tih a hriat a ni.
Enge a chhan ni ta ang le ? A enkawltute lam atanga a rik dan in inkhelh hma zan a zurui te pawh an awm niin an sawi lehnghal..!!! Insum thei nganglo kan nih chuan i inkhel ngam lo mai ang u. Tu’n an dem lovang che u. Hnung lam atanga mi nuih tet tet nih ai chuan tel ve loh mai tur. Khawtlang nu leh pa te’n tha leh sum nasa takin an seng a ni tih hria ula, hetiang mai mai chuan tu’n an sponsor duh tawh lovang che u. Sporting Club leh Local Council hruaitute tal hi chu zah der hram ila a lawmawm ngawt ang. Chutih laiin Fans kan nih ve dan te hi i in chhut chiang teh ang.. Lammual ah lut ni phei ila chuan Thana a lut tur kan tam awm mang e. Professional Football en peih peih te chu kan ni awm si a. I thangharh mawlh teh ang u khai. Veng aiawha kan fehchhuah dawn hian a dress velah kan duh tui viau em? Tournament dawn apianga ballboot beisei practice tha peihlo kan awm an ti. Veng dang coach kan lak pakhat chuan ti hian a sawi,” Chanmari west chu an player te an skill a hniam hran lo, an displine a chhe em a ni.” a ti.(‘em’ a tih hian a thluk vang vang) Chawlhni paltlang zo lo player kan nei thin hi a pawi a ni. Tun hma chuan thangthat an lakna te chu a rapthlak a sin thi leh dam karah an leng tak tak a, tunlaia thangthat kan lak na te chu exam result ah leh inkhel ah te a ni mai a, theih tawpa a thih tha tak meuh meuh a kan tan a ngai a ni. Kan hmingthatna tur hi zu leh thildang hian a hliah fo mai sim a hun takzet.
Sawi tawh ang in vengchhung players te hi kan chhelo, kan skill pawh a sang an ti a ni lawm ni. YMA pawhin tournament a la siam leh dawn. Kum kalta a selection te kha kan sawi sawk viau mai a, kan la ngai vawng vawng mai lawng maw. Kan hruaitute hian in hmakhaw ngai takin thil an ti a sin. Mi hlawhtling ni tur chuan tawrh a ngai. Tournament dawn a Gospel Camping neih kher ngai lo hian mahni theuh ah i in enfiah nawn leh teh ang u. Hetaing ang a nih chuan veng ai kan awh zo in rin ngam kan ni dawn em ni.
Heti zawng hian i ngaituah teh ang u, kan tum a tih takzet a kan beih chuan kan hlawhtling ang. A in mi pawh ni raw sek sek Tournament awm dawn leh awmlai te tal hi chuan insum hram hram ila, hlawhtlinna chu kan ban phak mai ah a awm tih hria ang u. Tui hi a let dawn tawh lo chuvang chuan keimahni hi i in enlet ang u. ‘Tumna a awm chuan kawng a awm’ an tih kha maw..
VAWI ENGZAT NGE ?
Samuela Pa
Member zat - 2469
Hruaitu zat - 250 vel
Mitthi zat - 9
Lumen zat - 8
Khawhar in len zat (YMA zan) -19
Member kal dan tlangpui - 95 vel 3.84 %
A chunga mi khi vawiin thlenga kan Branch dinhmun a ni a, a hnuai zawhna te hi han chhang teh le.
1. YMA member i ni a, vawi engzatnge i tlaivar?
2. YMA member i ni a, vawi engzatnge khawhar inah i kal?
3. Tlangval i ni a, vawi engzatnge thlan i laih?
4. Tlangval i ni a, vawi engzatnge khawhar inah i riah?
5. Nula i ni a, thlanlai thingpui vawi engzatnge i pek?
6. Nula i ni a, mitthi vui hma thingpui vawi engzatnge i sem?
7. Member pavalai i ni a, kuang siamna ah vawi engzatnge i kal?
8. Nu/Pa i ni a, vawi engzatnge i fanu/fapa mitthi/khawhar in a kal tura i tirh?
9. Nu/Pa i ni a, vawi engzatnge i fate thlanlai/thlanlai thingpui leh khawharin a thingpui lum/sem turin i tirh?
10. YMA member nu (pasal nei tawh) i ni a, a chunga mi ah te khian vawi engzatnge i telve le?
YMA hian dinchhan leh thiltum engemawzat chu a nei ngei mai. A tum bulpui ber zing a mi chu, mi dangte tana inpek, chanhai lusunte tanpui hi ni berin a lang. Kan hruaitu ten heng, chanhai riangvai leh lusunte hi kan VIP an lo ti thin a. Chutia kan VIP tanpui leh sawngbawlna a keini memberte ber pawh kan tel tha duhlo leh kan tel peih lo a nih chuan member kan nih chhan enge ni tih chu kan inzawhna tur pawimawh tak a ni ngei ang.
Kan Pathian thu in thihpui tham sual (hamartia) a sawi, tum thelh, nih tur ni lo, hlah etc a sawi ang em chu ni lo mahse, member kan nih chhan ber kan hlenchhuah peih si loh chuan sual a nih loh vek pawhin tha chu kan ti thei tawp lovang le! Member duhtak, sual leh a anga lang laka fihlimna pakhat ani tih hriain kum 2011 chhung hian YMA member i nihna hi VAWI ENGZATNGE i lantir dawn???