Infiamna lama changkang ramah, Coach atana mi an lak dawna an hmanraw hman tur an ngaih pawimawh thin riau mai chu engvanga pawimawh nge a nih? Krista tak nei lova Pathian thuril pui pui, nunpui theih a ram nei si lova kan sawi thin ang deuh hian, infiammite hlawhtlinna tak tak chu European Standard hriat hle lam a ni lova, hniam lutuk emaw kan tih atanga bul tan that leh hi a lo ni daih zawk.
1.Desire:- Duhna avanga mihring taksa chet nasat theihzia hi i hria em? Duhna nei lovin miin engemaw a pan ngawt thei lo tlat. Chuvangin hlawhtlinna pan turin duhna leh chakna hi thinlung ruangam dintu hmasa ber a ni. Mite hian engvanginnge hun leh tha tam tak senga infiamna an tih thin? Engvanginnge an thawhrim? Anmahni hruai kal thin tu chu mi thlen ang thlenve duhna hi a ni.
2.Dedication:- Duhna chuan a thil duh nei thei tura inpumpek duh hialna a hring a. Hei hian thil dang zawng zawng, kawnglaka lo tibahlah thei chi thlauhthlak duhna hial thlengin a neih tir a. A duhtu leh a duh a intawnna ah a hruai thin a ni.
3. Devotion:- Inpumpek duh hial khawpa duhna a lo len tawh chuan inserhhranna nunah mi a hruai lut a, bansan duh tawhlohna leh rilru sen tak takna an lo thleng a, an game khelhah chuan anbeisei ang hlawhtlinna hmu mai lo mahsela, a theih loh a ni ang a! ti a kirsan leh duhna chuan a hneh tawh lova, an vuan tlat a, an zui zel a, kahpah nunin a hneh tawh lo.
4. Discipline:- Kan hriat than ang hu a kan neih theih loh, nundan sang tak a ni. Mahni in thunun theihna, inhnehna, nun ti chhe thei thilin a run pawh a intihchhiattir lo tura harsatna pawh ngaihnep theihna nun sang tak, infiamna khawvela chaw zawng te tana kawng tluang, nun inthlahdah nuam ti mite tana atthlak ni si chu a ni. Thuawihna leh mahni inkhuahkhirh tlatna bawih a intukluh na a ni. Discipline hi hlawhtlinna unau pianpui a ni a, a tellovin hlawhtlinna a hmelhriat theih loh. Mi nawlpui peih chin bak tlem kal belh hlek zelna a ni. Mahni in lainatna hi -Discipline thattu a ni fo.
5.Determination :- Tumluih tlatna, a tha lama luhlul tlatna hi sapin ‘Determination’ an ti a ni awm e. Beidawng duh lo luhlul tlat mi hi khingpui te tana chimawm ber a ni a. Hlawhtlinna kawng a mi kallai pawh din tumtute tana hmelma lian tak a ni. Jesse Owen te anga he nun neitute lu-ah hian a ni hlawhtlinna chu a par chhuah thin ni.
6.Deligence:- Tumluih tlatna nun chuan taihmakna leh insenso peihna a hring mai, chu chu sual chhuahna nun a ni a. A pan lam hawi a kal laiin dodaltu nun zelthel te, chawlh duhna te, nawmchenna chi hrang hrang lakah indo a puang reng mai a ni. Hratlakna hi engemaw tal hmuh belh tura mi chettirtu a ni. Chawlh hlekna hian theinghilh thenna leh thlauhthenna a thlen. A tawp thlen hma a hlamzuihna, kawnglaka thamralna a ni.
7.Durability :- A hma lam a hlawhtlinna ze pawimawh zawng zawng kan sawi tak te kha teirei peihna hian a tuam beh tlat loh chuan an talpit a, kawng lovah an tla darh thin. Fuat a ngai a, thawhkhat tih that phut hi chakna a ni lo fo. Hlawhchham chang a lo thlen pawh a kal luih zel theihna a ni a. Chawl lo a kal na na chuan a tawp thlen hun a nei. Chhelna leh teirei peihna tello chuan hlawhtlinna chu mumang mai a ni.
Sorkar laka pangchan luat vanga tih tauh ngawt te hi mi hnehna a ni lova, midangte rilru hneh a, kan lama mi ngaituahna hip tur chuan mahni in tanpui hmasak hi a kawng hnai ber a ni a, lamtang siam nan tawngkam cheh duah aiin a tangkai. Infiammi ropuite hian midangte leh sorkar tanpui nain bul an tan ngawt lo. Jackie Joyner Kessie, mahni intumchawp a khawvel hmeichhe ‘athletic’ ropui ber ni ta te, fahrah chawmna in a ni khata Rs 5/- rate a chawm ve mai mai Dingko Singh Boxing tlangchhipa a lo chuanchhuah dante hi thawnthu mai anni hauh lo. Hlawhtlinna leh hrehawm an lo inthleng tawn dan te chu ngaihnawm a tling. Tluangtlam taka hlawhtling an awm thei. Mahse chanchin zir tlak an nei ve ngailo. Infiam mi hlawhtling ringawt nih tum lo la, i hlawh tlak nun neih talh tum la, i thih hnu a i nun reng na tur a ni.
Mizo infiammi ten thuvawn-7 hi kan kaltlang lo hlawm hle niin a lang. Tuna kan tih nghal theih vek an ni a, tumruhna vuai leh mai tur hi veng turin tumah kaichhan a sawm ve theihloh. He’ng formula kte hi i hlen chhuah chuan Zoram leilung rualremlo tak atang hian khawvel hmundang mual remah a la phurchhuak pui ve ang che.
An ropuizia hriat lohte ropuina mak tak chu !
T-a
Thu ropui tak ziah tum hi thu ropui tak ziah tur hre lo tan chuan thil hahthlak tak a ni. Ho deuh pawh hi ziah tur hriat a har khawp mai. Hruaia VL (Vanlalhruaia) tih ringawt hi ziak tlar thla teuh ila, thu ‘ho’ takah thenkhat chuan an ngai ang a, an hlimpui phian mai thei; thenkhat erawh chuan ‘ho’ an ti hle ang a, min dem luai luai ang; thenkhat erawh chuan a hoh leh hoh loh pawh hrethiam chuang lovin ‘ho’ an ti em em dawn tih a chiang a, heti ang thu ‘ho’ lutuk han ziah vak mai chu a ‘ho’ lulai em mai an ti mai thei a, a awm; a ‘ho’ dawn em a ni.
Kan vengah hian mi turu tak tak an awm a, mahse, mi tam berin an ropuizia an hriatpui hran lo. Entir nan; kan tarlan tawh tho Hruaia VL ang chite pawh hi ‘ngang tak chu a ni hrim hrim,’. Sawi tak zelah chuan U Rimtuia pawh nupui ngam vangin ? A tlatna mual a thlak a, Thinglian khuaah chuan eng eng emaw hruaitu pawh a ni tawh mai thei (Kohhran rim nam lam chi ni rih lo mah se a pawi lo zawk). Rim chhia lo ti tawk emaw pawh an kat nawk ang.
Thianpa Hruaia VL, thiante tana inphal tak hian incheina chu a ngai pawimawh thin maw le ! A nupui a chhai thluk dan ‘style dang lutuk’, zanlai pelh YMA AW buatsaih zawh hnua a formulae hman thin erawh sawi lo ila.
MA a zir chhung zawng khan kawr hakthlak a neih loh vang a ni lo; Kamis var rei em em a hak tawh, a dung zawnga te reuh te tea tial chho, a nawh mar khat em avanga a hnung lam chuar vual chho deuh tup tawh ringawt a ha. Hahnawhna a neih loh vang ni lova sahel seh thi reng ang maiin nitin class a kal thin; teri-cotton (terelin a nih leh nih loh chu ka hre lo va) kekawr tluan rawt bik a nei bawk a, a tlang a arh deuh hluai leh nghal. A duh aia a sei vang nge a duh ve hrim hrim tih pawh hriat lohvin a tlang inches hnih vel thlep letin a chhing deuh to va, hemi ha chung hian a kar tluan thin. Pheikhawk pum ni lo chapal dum, nikum hmasaa hmu tawhte pawhin ‘Kha ila nei a ni maw ?’ an tih theih tur khawpa a bun rim nen ringawt MA Economics tha takin a pass chhuak.
Kamis pakhat, kekawr pakhat, chapal pakhat, eng kekawrte nge a hak chu ka hriatpui lo va, ka rin dan chuan a uk emaw a pawl da emaw a nih ka ring a, kum hnih MA a zir chhungin a mawng a tet a nih loh chuan a pan hman hle tura ngaih a ni a, a chhan chu a hakthlak vakin ka ring lo va, a inbual ngai miah lo tihna phei chu a ni lo. Ruahsur a do fuh chang chuan Sakhi pawh hi a inbual ve thin an ti. Tunah chuan kan tluk loh sorkar hnathawk lian a ni tawh a, a chal a thui tual tual a, a dul pawh a kiar ve telh telh a niang, tute emaw tih angin kan khelh phak loh badminton-te hial a khel ve ta : Cock vaw fuh thei lo mah se nuam a ti viau niin an sawi.
U Rimtuia pawh a vanglai kha chuan turu tak a ni. Khawvel dangah hian ka la hmu lo va, ka dam chhung hian ka hmuh hman pawh ka inring ta meuh lo. Naupang Sande Skul, junior department-ah zirtirtu a nih lai 1995 chho vel kha ni tain ka hria. Skin tight kekawr bul a lar a, ani chuan skin tight chiah lo; skin tight deuh roh, a dum, a bul pawh ni lo a tluan hain, sam zuah kir sei chuat chungin Sande Skulah a inkhawm a, T-shirt a ha leh nghal. A kekawr hak chu a ke artuiah a zuih ral hneh hle a, taksa phuar deuh tang a nih avangin a kap bawr pawh a lang bawr tha nelh nawlh khawp mai. Chuti chung chuan tui takin naupangte a zirtir a, inthlahrunna a neih awm reng reng hriat a ni lo va, a inthlahrun loh em emna pawh a awm chuang lo. Incheina a ngai pawimawh a, a pheikhawk dum bun kha beatle-shoe nge vai pheikhawk ka hre chiang ta lo. Sam sei kir, T-Shirt nen, kekawr ti deuh ‘sprang’, a dum leh nghal. Nuthlawi thenkhat boruak ngam deuh pawhin a lawnga an hah duh loh tur chi ha chungin, Sande-Skul zirtirtuin Sande-Skulah Sande Skul naupang a zirtir a, khang a zirtir takte kha engtin nge an awm tak zel tih erawh sawi zui ngai lo a ni a, amah pawh sawi zui a ngai chuang lo.
Rinmawia (bracket chhunga MZP tih dah hian hriat a awlsam bik) pawh a nupui a ngam em avangin Luangmual lamah min kalsan ta a; a ngaihawm chang a awm zauh zauh. Ani pawh hi incheina ngai pawimawh tak a ni a, T-shirt nghawng nei a ha tam hle a, mi pangngai hak tawk tura siam ni mah se, Rinmawia hian a lei fuh lo ziah nge maw ni ? a kawr banah hian a ban pahnih rawlh mah se a thawl ziah.
High Field-ah YMA Aw-a kan awm ho laiin kan inkhel a, inkhelh laklawh laiin a rawn lut. A T-shirt nghawng nei hma lam ipteah pen a pai lut a, teri-cotton kekawr tlawn a malpui thlengin a thlep chho bawk. He kekawr hi a ha rim hle a, a hak loh lai chu a inbual lai a ni deuh ber; a uk da lam niin ka hria. A thlep chhing viau na a, a malah a tawt chuang lo va, ke kawr bul lian tha pangngai ang takin a hmang thei. Mawza tel lovin mi ta a hawsak ball-boot a bun bawk a, tichuan a inkhel ta a, hmuhnawm dang a ngai tawh lo. Penalty a pet a, theihtawpa a chhuih chu a lir lut zo lo.
U Nunthara incheina leh chet dan bakah, badminton a khelh hmaa Lalhmingliana nunte pawh tarlan a chakawm. Nakkinah hmun awl remchang, hnawh khat tur a awm leh a nih chuan kan la ziak turah ngai ang. Tun tum pawh tikhah a ngai si a, kan tikhat leh ta hram chu a ni e.