Lirthei siamchhuah/ hmuhchhuah a ni hi mihringte’n kan tangkaipuia kan chhawr viau laiin, kum tin hian mihring nunna tam tak suattu niin, mi tam takin hliam tawrh phah nana hmangin, a thenin ramtuileilovin an awm phah bawk a ni.
Kumtin hian khawvel pumah lirthei avanga thi mi nuai nga (5) zet leh hliam tawk maktaduai khat zet an awm ziah anga chhut a ni. India ram hi lirthei chetsual tamna ber te zinga mi a ni a, Lirthei chetsualna-ah hian kumtin mi singsarih vel zet leh hliam tuar mi nuai thum leh singnga vel zet awm ziah ang a ni. Heng chetsualna zawng zawng lo awm chhan za-a sawmriat 80% hi mihring thiamloh/tihsual vang a ni a. Lirthei khahltu thiam loh te, passenger thiam loh te leh ke-a kal te thiam loh vang a ni deuh ber thin, khawl lam fel loh vanga chetsualna thleng pawh a awm ve nual. Traffic chungchanga khawvela thil thleng hmasa berte i’n thlirho teh ang.
Lirthei chesual hmasa ber - Cugnet’s Steam Tractor-in kum 1771-a Paris ralthuam dahkhawmna bang hniam te a sut kha a ni.
Dan (Act) hmasa ber - British ho dan “ The Locomotive and Highway Act,- The Red flag Act, 1865” an tih bawk chu khawvela traffic dan awm hmasa ber a ni a, he dan ang hi chuan, lirthei pakhat khalh turin mi pathum- a herhkawitu, mei lo tuah tu leh lirthei dang lo kalte lo hrilhlawktu an awm a ngai a ni. A pathumna phei hi chu flag sen kengin yard 60-a hla ah a lo kal hmasa tur a ni.
India ramah chuan Motor Vehicle Act hi kum 1914 khan hman tan a ni a, Mizoram-ah pawh kum 1996 khan Mizoram Vehicle rules kan nei ve tan.
Motor Number hmasa ber - Police-ten motor number an pek chhuahna hmasa ber chu France ramah kum 1893 khan a ni.
Pawisa chawitir hmasak ber - Kum 1895 khan John Henry Knight chu kawngpui (High way)-ah thirsakawr ke pathum nei chi a khalh avangin man a ni a, court-ah hruai niin chawitir a ni.
Mizoram-ah chuan traffic Police ten pawisa an chawitir hmasak ber chu Lalthlana D/L No. 10419/M27 Prof 89- ZRM 2525 (Truck) khalhtu a ni a, November ni 1, 1990 zing dar 10:00 A.m-ah midangte dipdala a truck Electric Veng Power House bula a dah vang a ni.
Thihna thlen khawp chetsualna hmasa ber - Kum 1899 February ni 25 khan London Grove Hill-a Harrow-on-the hill an tih hmunah car a chesual a, a khalhtu a boral.
London-a number plate hmasa ber - Kum 1901 khan Earl Russel-a chu a Motor number atan A -1 pek a ni.
Alkatra hman hmasakna ber - Kum 1902 khan Monte Carlo-a vaivut khu lutuk tihreh nan Macodam-ah Alkatra hman tan a ni a, Swiss mi Dr. Guglielminetti-a ngaihtuah chhuah a ni. A tirah chuan chhuang so lovin a daiin an hmang.
Motor Car Act - Kum 1904 January thla khan Britain-ah hman tan a ni a, hemi dan ang hian lirthei zawng zawng chhinchhiah (registered) a, number plate tar vek tur a ni a, tin lirthei khalhtute’n khalh phalna license an nei vek tur a ni. Amaherawhchu driving test an nei ngai lova, form an fill-up a, Dakin-ah pawisa dahin license a neih mai theih a ni. He danah hian hlauhawm taka lirthei khalh chu dan bawhchhiatna lian tak a ni tih ziak meuhvin dah a ni.
(Kan rama dan -MV I Act section 184-na ang hian)
Petrol Pump hmasaber - Kum 1906 khan USA-ah Petrol Pump hmasa ber siam a ni.
Traffic light hmasa ber - Khawvela Traffic Light hmasa ber chu kum 1919 khan Detroit, USA-ah hman tan a ni a, Britain-ah chuan kum 1928 khan Wolverhamton-ah hman tan a ni London-ah chuan kum 1932 hnulamah hman tan chauh a ni.
Traffic sign hmasa ber - India rama Traffic sign hmasa ber chu Bombay (Mumbai) a Mayo Kawng leh Veer Narimaan kawng intawhnaah June 1955 khan tar a ni. Mizoram-ah chuan kum 1968 bawr vel khan Mizo High school peng pan chhohna step bulah ‘School Ahead’ tih tar a ni a, chu chu cautionary sign tar hmasak ber ni a hriat a ni. Tin, Treasury’s Square leh Pawnpuite In (Reid House/ Raj Bahvan North Gate ep) inkarah 1974 khan Pu S.Gogoi(MPS) chuan ‘No Horn’ tih a tar a, chu chu Mandatory sign hmasa ber a ni.
Kea kalte kawngkanna (Pedestrian Crossing) hmasa ber - Kum 1934 khan Britain-ah hman tan a ni.
Hmeichhe Traffic hmasa ber - Kum 1964 khan Paris-ah a vawikhatna atan Traffic Police-ah an duty tan a, Delhi-ah chuan kum 1989 khan an chhawr tan ve thung. Aizawl khawpuiah chuan kum 1977(tawp lam) khan Traffic Police-ah hmeichhia chhawr tan niin, kum 1989 atang khan tihtawp leh lawlawk a ni