Ziaktu leh sawitu tam takin, ‘Hruaitu tih chu pawl pakhat hmalakna leh thil tihna kawnga hmahruaitute hi an ni a, Hotu tih chu intilal taka rorel ringawt tumtute hi an ni’ ti angin an hrilhfiah fo \hin. Mahse, hei hi hruaitu tih awmze dik leh Mizoten kan hman \hin dan chu a ni chiah lem lo. Hetianga a ngial a ngana thu lak chingte hi chuan \awng kalphung an bosal tihna a ni a. Hmaiphih tih vangin hmai vun a phiha phih turah an ngai ang a, puan\hui thiam tih vangin kawr leh kekawrte \hui thiam lova puan chiah \hui thiam turah an ngai ang a, lu met tih vangin lu vun tak tak ziah hiar hiar turah an ngai ang tih te pawh a hlauhawm rum rum mai.
A tak ramah chuan, ‘Kan hotute duh danin..’ tih te, ‘Kan hotuten \ul an tih chuan..’ tihte hi kan hman \hin dan kumkhua chu a ni a. Hotu tih vangin tumah dictator angin an khawsa ngai chuang lo va, hruaitu tih vangin kawng hre lote hruaitu(guide) ang leka hmahruai ringawt hi an mawhphurhna an ni chuang bawk hek lo. A Sap \awnga Leader tih kan sawina leh a tlukpui a ni ve mai.
Thiltihna kawng hrang hrang, a \ha lamah emaw, a chhe lamah emaw pawh ni se hruaitu leh hotu an awm zel a. Sual lam kawngah pawh a lo daidar hmasatu leh kawnghmang hre tawhte hian hotu chan an chang ber zel \hin. Sual kawng la zawh ngai lote pawh duhsak leh an hma ngai ni awm takin thiam takin sual khurpuiah an hnuk lut a. Mi bum, mi rawk leh mi suam thlengin an kaihruai a. Zu in leh ruihhlo hman lamah te, a zawrh leh a tawlhruk lamah te, KS leh nawhchi zawrh lamah te, mihring tawlh ruk(human trafficking) lam te thleng hian hmahruaitu an awm zel a. Hmahruaitu leh hotu ni kawp nghal pawh an awm fo \hin. Hetiang hi mihringte ze pakhat a nih avangin, “Kan unau, kan fate sual kawng zawhna chhanah mi dang puh tur a ni lo” ti bawk \hin mah ila, sual kawnga hruai luttu leh hotu an nei zel \hin tih erawh phat rual a awm lo va ni.
A \ha lam kawngah pawh hruaitu leh hotu hi an awm zel \hin a. ‘Hotu \ha i nih theih loh paw’n zuitu \ha tal nih tum rawh’ tih hi mahni infuih nan thuvawnah neih ve mah ila hotu \ha nih chu sawi lohva lum, zuitu \ha nih pawh hi ka tlin ngang lo tih chu ka inhre chiang a. Keima tawnhriat a\anga ka chian em em mai chu zuitu \ha ni tur pawh hian eng kawng emawa lo tlangnel tawh leh kawnghmang hre tawh min sawmtu leh min zaizaptu an awm a pawimawh fo tih hi a ni. A hminga nupui fanau nena kawi ve diah tawh hnua khaw thar, veng thara han insuan luh hi chuan keini ang rual pawl thiam lo te tan chuan tlangnel leh khawtlang thila lan tam a har hle \hin a. Hetiang hunah tak te hian zaizaptu leh hruaitu hi an pawimawh fo \hin.
Han sawi kual thui hret ila. Tu kan demna ni hauh lovin, Aizawl veng hrang hrang pathuma kan chen ve tawhnaah khawi vengah mah mi kawmnel tum leh khawtlang thila tel tura min zaitu leh sawmtu ka la tawng ve ngai lo. Keima mizia, khawsak phung leh eizawnnaten a zir loh vang a ni tih chu ihe lovin ka pawm thlap a. Min sawmtu leh chiauautu lo nei \ha pawh ni ila, eng kawngah mah zuitu \ha nih ringawt pawh ka tlin lo tih chu ka pha hauh lo. Amaherawhchu, zaizaptu leh hruaitu an awm phawt chuan mahni theih ang tawk te tea inhmanna tur erawh a bo bik hauh lo. Chanmari West indan dawna YMA-in Bung banglaa picnic an neih \um pawh khan \hianzaho ar sawhchhiarna pawha vawi khat mah la fatu ngai reng reng lo kha fatu atana min rawn ruat ve mauh mai a, a zei lo a zei lovin ka’n fatu ve hram a. Chu pawh chu min sawm leh min ruat ve vang liau liau a ni.
YMA AW editor kum rei tak lo ni tawh \hin, kawng hrang hranga tawnhriat ngah lama a ne pawh ka eh phak hauh loh khan Kum 2001-a CWYMA zai pawlin hla an zir khan enpui turin covener a nihna angin mi rawn sawm ve mial a, ka’n enpui ve nual a. A hnuah pawh, thiam ang tawka thu hohai te te ka lo thai ve \hin vang ni maw, Literature Sub Committee member atan mi hnuk lut leh a, ka tlin ang tawkte tein ka inhmang ve ta zel a. Tun thlenga chanchinbu leh radio lama ka kuthlei leh ka inhman ve zelna chhan pawh hi min zaizaptu leh sawmtu, min titlangneltu an awm vang tih ka chiang khawp mai. Min zaizaptu leh sawmtute chu min hruaitu an ni chiang a,(an huatthu suhah) ka hotu erawh an ni vek kher chuang lem lo. Hemi a\ang pawh hian hmahruaitu leh hotute danglam dan chu kan chiang mai awm e.
Muhammed Alia-a pawh kha a naupan laia a thirsakawr bo vangin Joe Martin-a( police) hnenah \anpuina a va dil a. Boxing coach ni bawk Joe Martin-a chuan Ali-a hawiher leh pianzia a hmuhin boxing lama lut turin a lo sawm hmin a. Joe Martin-a kaihhruaina hnuaiah chuan Ali-a kha boxing khawvela mi ropui leh hming dai tawh ngai lo turah a inchher chhuak ta nghe nghe a nih kha. Joe Martin-a kha Ali-a tan hruaitu leh hotu nih a kawp nghal a ni.
Kan sawi tak ang khan, mite zaizapa hmahruaitu leh hotu tihte hi awmze hrang leh mawhphurhna pawh dang daih ni mah se, mi pakhatah a inbilh khawm thei fo va. Chuvangin, hruaitu tih leh hotu tihte hi thuhmun rengin kan hmang fo \hin reng a ni. Mi ho khawm thiam leh fing, rorel leh hmalak thiam, mize dik leh rinawm, tlawm hun leh huai hun hria, mi inpe zo leh a \ul anga hmahruai zar zar theite hi pawl(organization) chang ni lo, \hianzahote pawhin kan mamawh ber, hruaitu leh hotu nih tlingte chu an ni e.