Duat tih hi Mizote hian hmangaihna leh duhsakna lantirna sang berah kan ngai thin a. A dikna chin awm bawk mah se, tur (poison) kung lei tha vura tui pek thin a anna chin a awm thei fo thin. Mikhual leh inleng kan lo ngaihsaka kan theih ang tawka ei leh in, mutbu, an khawsak vel dan nuam leh awlsam tur zawnga duat theih erawh a hluin a mawi a, mi puitling leh zahawm kan nih theihna kawng khat pawh a ni ve reng a. Mizote hian khual chhawn leh lo duat vel hi kan neihten a la tlin loh bakah kan la thiam tawk lo fo zawk thin chu a nih hi.
Tun tuma sawi kan tum tak zawk erawh chu kan laina hnaivai, kan nupui/pasal, kan tu leh fate duat kan tum dan zawk hi a ni a. Kan lengzem hla pakhatah pawh, “Run hmun kan len hun chuan ka duat viau vang che.” tih te pawh a awm kha. He hla phuahtu hi chu a bialnu hi a fel chi a lo ni lo hlauh ang a, an induat sual ang tih ka hlauhthawnpui tak zet mai, kan pi puten, ‘Hmeichhe vau loh leh vau sam loh chu...’ an lo tih kha a la dik tluang zel si a.
Induat hi hmangaihna lantirna sang ber anga kan la ngaih tlat avangin kan fate duhzawng apiang tihsak kan tum a. Naupang te an nih lai atangin tapa an ngen tawh phawt chuan an ha muatna tur te, an pumin a ngeih loh tur te, an hriselnain a tawrh tur leh an hmasawnna tikhawlo thei tur pawh ni se, kan hlawhtlintir zel a. Mi inla changkang thenkhatte tih dan thikin, ‘Mate/Bawihte,’ tiin ka ko duat hliau hliau va, an duhzawng buaipuiin kan phi ruai thin. Duatna hian rilru pangchanna leh nona a thlen thei a, an rilru a pachan loh phah ang tih lam reng kan ngaihtuah ngai lo va. An taksain a mamawh ni si lo, an ei chak apiang leh an awhzawng apiang tihhlawhtlinsak kan tum tlat thin.
An lo leikan deuh hnuah pawh an men peih chen chen mentira an mut duh chen chen mut kan phalsak a, lehkha an zir that peih loh pawn kan phun lungawi ve mai mai thin. Sikula an mamawh tawk aia tam pawisa kan paitir a, a lo rei deuh hnu chuan kawng dik lo zawh phah nan an hmang nge nge thin a ni. Naupang, an pi leh pute bula khawsa chu an pangchang duh an ti thin pawh hi an pi leh puten anmahni rila rah, an fate ngei aia an duat zawka an fate tana an phal loh bur thin pawh an phalsak zel thin vang leh an rilru a nem leh duai thin vang a ni fo.
Sap missionary chhungkaw khat, an in atanga Lalnu Elizabeth-i te in lang pha ngat khawpa London khaw lailia khawsa thinte nen inthenawmin kan khawsa tawh a. An naute khuma an mut a tah a tah pawn an thiltih an thulh ngai chuang hauh lo. Tum khat chu an fanu kum 7 mi vel Mary leh ka farnuten Japan zawngtah kan tih mai, kutphah chen vela sei zawngtah phek chi mu an lo ei a. Mary haw hnu chuan a nu chu hmanhmawh taka rawn tlanin ka nu hnenah, ‘Pi Ngur, Mary-in eng nge a ei, a uih lutuk,’ a rawn ti a. Ka nu chuan hlauthawng takin,’Ka pi, hetiang mu hi an ei a,’ tiin zawngtah rah chu a lo entir a. ‘Theirah chu a pawi lo, a duh chuan ei rawh se,’ a ti a, a haw lehnghal ta mai a. Vawi khat pawh Sap nu hnenah chuan ka nu lo zualkovin,’Ka pi, Mary hi theihai kung sang tak takah a lawn a, a tlak ka hlau lutuk,’ a lo ti a. Ani lah chuan, ‘A tlak chuan a sim mai ang,’ a lo ti sam et a. Chumi atang chuan duat hmachhuan leh a no ngiak ngiak zawngin fate an enkawl ve hauh lo tih a lang chiang hle a ni.
Fate hmangaiha an hmakhua tur thlirpui thiamte chuan duat tih hi an dah lal ber ngai lo va. An nun tha lo an sim theihna tur a nih phawt chuan tiang chelek pawh an hreh ngai lo. An fate duhzawng ni lovin, ei leh in tha, an hriselna, an silh leh fen, an zirnate leh an rilru leh taksa chhelnate an ngai pawimawh ber a. Sap kan tih mai khawthlangho phei khu chuan an fate tlema an lo leikan hnu phei chuan mi hrang en takin an en a. Chu chu an hmangaih loh vang ni lovin an fate an lo puitlin theiha an hmakhua anmahnia an sut kuak theih nan a ni. Anniho inenkawl dan ang siar siara inenkawl chu kan dinhmun leh khawsak phungin a la pha lovin a la inrem chiah lo mai thei tih hriat erawh a tha..
Duat tih hi a titu lam rilru nona rah chhuah a ni a. Kan rilru hlimna leh kan lungawina kan dah lal ber vanga kan tu kan fate duh ang apiang tihpuitlinsak kan tum tlat vang a ni fo thin. Fa duat ngiak ngiak, fate duhzawng leh nuam tihzawng ringawt dah lalsaka enkawl thintute aiin chhel tur leh fel tur zawnga hmangaihna nena enkawltuten fate an chhuah puitling zawk fo thin tih erawh hmuh tur leh hriat tur kan haihchham hauh awm lo ve. Chuvangin, duatna (affection) aiin an hmakhua tana duhsakna dah lal thiam zawk nachang hre tura nu leh pa tinte kan inzir a hun ta hle a ni.