European club liante khu khelh nga a zawna an talbuai chuan an manager chungah delhtu lian tak a awm nghal. Amah ruaitu club hotute lam atang aia hmain chanchinbu mi leh fan pawr zualten bang turin an nawr vat a, a dihmun an tiderthawng zualin; he lai Mizoramah pawh "Ban tawh se," "An van ban har em em," kan lo ti ve thin.
Kalphung mumal tak neia thil kalpui an ni a. Club-in manager atana tu emaw an rawih dawnin inremna an siam a, a hlawh zat tur te, contract a ziah rei zawng tur te bakah, contract thenkhatah chuan bonus leh hlawh pun dan tur thlengin an ziak tel thin.
Tun dinhmuna English Premier League bika thil thleng thlir ila; champion lai Chelsea Italian coach Carlo Ancelotti, Liverpool manager Roy Hodgson, Aston Villa French boss Gerard Houlier leh West Ham boss Avram Grant-te chu ban mai hmabaka awm niin an sawi.
English league-a manager nghet ber pahnih; 1986 atanga Manchester United-in an rawih Alex Ferguson leh 1996 atanga Arsenal team enkawltu Arsene Wenger-te chuan manager an nghet ta lo lutuk chu veiawm an tih thu sawi ve vein, an hnathawh ang thawk ve, an duh reng vang ni lova harsatna tawk mekte chhanin club-in duh taka an lak luh tawhte chungah dawhtheihna nei nasa lehzual se tih an duh.
Entirna pakhat tarlang ila; Chelsea boss Ancelotti chu season liam ta khan Italian football atangin England-ah a pem a, Chelsea club a din chhunga thil thleng ngai lo thlentir nghalin league leh cup trophy a hui kawppui a, a hlawhtling em em a, chawimawina nasa tak a dawng.
Mahse, season kal mekah Chelsea-in vawi 21 khel tawhin pangana an ni pha hram a. Champions League an khel phak ngei ang em tih sawi harsa a ni. Ancelotti hian a dinhmun a derthawng hle tih pawh a hre chiang viau a, mahse, club neitupain ban ngawt se nghawng lian tak a nei dawn a ni.
Ancelotti hian Stamford Bridge-ah thla 18 daih contract a la nei a. Kum khatah pound maktaduai ruk hlawhin, a thawhpui mek Bruno Demichelis leh fitness coach Giovani Mauri-te nen Roman Abramovich-an hnawt chhuak ta se, zangnadawm nan pound maktaduai 10 chu a sen thlawn ngei a ngai dawn a, Chelsea sum dinhmun thlirin Russian billionaire hian Italian hi a ban mai an ring lo.
Jose Mourinho a bantirna avanga sum a hloh thlawn tawh te, Luis Felipe Scolari a ban avanga zangnadawmna sum a sen ringawtah Abramovich hian pound maktaduai 10 chuang a lo hloh tawh a. Inban hi a tawpna a ni mai lo va, duh taka contract an lo ziahpui tawh an ni a, contract an hman zawh hmaa manager-ten an duh reng vang pawh ni lova ban an tawk a nih chuan club-in contract an lo ziah tawha an la hman zawh loh hlut zawng an rulh a tul a, manager dang an rawih leh tho a ngaih avangin an manager hluiin contract a neih chhung chuan manager pahnih rawih nan sum an hmang tihna a ni.
Hei tak hi club lian harsatna a ni a, duh hun huna manager ban mai hian sum tam tham lutuk a nghawng tel that a. Chu mi piahah manager thar tha tak lak luh a harsa hle a, club dang rawih lai lo phei chu chet that tum tak tak tan rawih tur tha an vang a. An club-in mi a hip hle a nih loh chuan sum tam zawka thlem chhuah a ngai dawn tih a chiang reng.
Chelsea bik sum hman thlirin, 2003-a Abramovich-an a lei atanga kum hnih chhungin pound mtd 230 a seng der a. Tunhnai maia an tarlanah chuan Russian mi hausa kuta a tluk luh atangin Blues hian pound mtd 726 leiba a nei tawh a, club-in sum a hloh tawh zat pawh pound mtd 493 a ni a, 2005 khan season khat chhunga hloh hnem record Premier League-ah siamin pound mtd 140.2 a tling.
2008-2009 season chhungin pound mtd 44.4 an la hloh tho va. Ruahmanna an siamah 2010 atangin hloh lova kal theih an inbeisei tawh avangin an sum hman pawh tun hnai teah a tla hniam em em a. Player hlawh hnem tangkai lutuk lo chhuahtir zelin khawng takin sumah inenkawl tawh mah se, season liam taah che tha viau chungin pound mtd 40 chu an hloh tho rin a la ni pha a, an sum dinhmun dik tak an la puangzar lo thung.
A tahtawla insiam lian chho ni lo va, sum tam tham senga indin chhuak thut an nih avangin sum enkawlah harsatna lian tak Chelsea-in an tawk chiang a. Tunah pawh an dinhmun siam thatna tura pawimawh nia Ancelotti-an a sawi chu player thar lei a ni a. Club neitupa a ip tawh laia sum hloh zawnga manager ban phei chu Chelsea tan thutlukna siam harsa tak a ni tawh niin an sawi.