Indian politic hre tak Sekhar Datta chuan : "A rosum leh hausakna dang reng rengte hi a tlem em em a, rickshaw pute ai pawhin a rethei zawk," tiin tunlai Indian politician zinga an ngaihsan rawn luai luai Manik Sarkar-a chungchang a sawi.
February 14 khan Tripura assembly inthlanpui neih a ni a, Communist Party of India-Marxist (CPI-M) chuan seat 60 zinga 49 lain hneh takin sorkarna an siam leh. An hruaitu Manik Sarkar chuan a zawnin vawi li chief minister hna a chelhna a ni a, miten an hriat dan langsar tak chu India rama chief minister rethei ber a ni.
Term thum ngawt chief minister ni tawh kum 64 mi Sarkar hian hausak lam aiin retheih lam a pan a, tun \uma inthlan a chuh dawn khan $ 10,800 chiah a nei niin Election Commission chuan a chhinchhiah.
2008-a Tripura inthlanpuiah khan Sarkar hian $ 16,120 a nei a, kum nga chief minister a nih hnuin a sum nei a tla hniam. 1998 atangin kum 15 chhung state pakhata lal ber a ni tawh a, thla tin $ 5,000 hlawhin a hlawhte hi kum nga chhungin tihpun a ni miah lo va, thla tinin a hlawh zawng zawng an party CPI-M tanpui nan a chhung lut fai vek zel.
India rama state hrang hrang chief minister zingah Sarkar hi a rethei ber a ni mai lo. In leh lo a nei lo va, lirthei pakhatmah a nei lo va, bank-ah sum khawl a nei mumal lo bawk. Chief minister dangten in hmun lo ram, lirthei \ha leh changkang bakah sum tam tham an kawl \en \un laiin chief minister zinga heng zawng zawng nei ve miah lo awm chhun chu Sarkar hi a ni.
Tripura chief minister hian mobile phone pawh a nei chuang lo va, a hna atan an party CPIM ta Scorpio car hmangin a zin kual \hin a, inchhekarbawm nan a car chungah vawitekhat mah VIP light a chhi ngai lo.
Ni khatah darkar 12 hna a thawk \hin a, a thawhpuite chuan mi kawm nuam leh nelawm tia an sawi rualin hnathawh kawnga hmahruaitu khauh tak a ni tiin a chanchin an sawifiah.
A nupui Panchali Bhattacharjee nen chiah khawsain fa an nei lo va, a nupui hi sorkar hnathawk \hin Central Social Welfare Department-a Welfare Officer pension a ni a, Sarkar aiin a hausa zawk hle. Panchali hian pawisa fai $ 22,015 a kawl a, bank-ah $ 24,52,395 a dah \ha bawk.
Sarkar chuan : "Ka nupui pension sumin kan nung a ni ber. Ka sum hman chhuah hi a tlem em em a, ni tina zial ka zukna bak hmanna tur ka nei mang lo," a ti a, Sarkar-a nupui Panchali chuan zing tin a pasalin a thawmhnaw hak tur a la su ziah \hin tih a sawi ve thung.
Lawng khalhtu Amulya fapa Sarkar hi August 2009 khan a nu Anjali chuan a thihsan a, a nu hi Tripura health department-a thawk \hin a ni. A nu a thih hnu hian Tripura khawpui Agartala-a an in lian lo tak chu rochunin $ 2,00,000 vela hlu a ni. Mahse, Sarkar hian a in neih chhun hi a farnu Ratna hnenah a pe vek.
Communist thuthlung zawm tlattu Sarkar chuan : "Sawi aiin a tih a tih a au ring zawk. Hna kan thawh leh kan chet dan hi kan thusawi leh kan tawngkam aiin a pawimawh em em a ni. Dik leh tha taka hna kan thawh chuan kawng engkimah Tripura hian hma a sawn ang," a ti.
February-a assembly inthlanpui an neih dawn pawhin CPI-M nena inbei Congress chuan Sarkar-a sorkar beihna tur an tlachham. Nun lang tlang, zahawm, ropui danglam bik a nihzia an hriat chian em avangin lukhum phawk meuhin an chawimawi lo thei lo.
An state-a Congress hotu Tapas Dey chuan "Manik Sarkar-a zahawmna leh rilru pauhkhauhzia dodal zawngin eng thil mah tih kan nei lo va, a nunah zawhna zawh buai ngai a awm lo. Mahse, sorkar a kaihhruai danah tihsual a nei ve thei a, chuti chungin Manik hi mi zahawm chungchuang a ni," tiin a sawi a, an el ber ni mah se an fak lo thei lo.
Indian politic awmzia hre chiangtu Datta chuan : "Pasal\ha rorum Spartan nunphung kha a nunpui a, a zahawmzia leh a dikzia hi sorkar lai Left Front (CPI-M)-te tilang mawi em emtu a ni. Mipuite hlimna leh \hat tlanna hi a atchilh bur a, mimala a ham\hatna tur lam a thlir ve ngai lo," tiin a sawi.
Kan state \henawm maia Indian politician-te entawntlak hnuhma hnutchhiah mek Sarkar hian 1970 khan Calcutta University atangin Bachelor of Commerce (B.Com) a zir zo va, 1967 khan politic a luhchilh thung.
1993 khan Tripura state CPI-M secretary-a thlan a ni a, 1993 vek hian CPI-M chuan Tripura-ah sorkarna siam leh \anin Chief Minister Dasaratha Deb-a hnuaiah Sarkar chuan ram rorel dan a zir belh.
Deb pawh hi ram hmangaih leh rethei tak niin, kum nga chief minister a nih hnuin Sarkar chuan a thlak a, danglamna lian zawk thlenin kum 20 chhung chawl miah lova chief minister ni turin term lina a hmang \an leh chiah.