Kan ngaina, kan tuipui, kan buaipui, kan insual phah, veng pumin kan hmingchhiatpui tawh. Zep thu a cheng lo; kan veng baka Football-a rualawt leh ngaisang hi Zoramah hian an awm bik dawn em ni? Chuti chung chuan Mizoram pum huap inelna lian thamah Champion chu sawi loh, Final tak ngial pawh kan la lut lo hi chuan ngaihtuahna a tithui duh hle mai. Inter-Village a ni emaw, Central YMA buatsaih a ni emaw, tournament lian tham kan hmachhawn dawn apiangin – “Champion tura rinkai pawl kan ni” “Players en chuan kan Veng aia tha an awm bik lo” tiin kan inhmu lian ve viau. Mahse…… kan veng aia thiam bik lo leh tha bik lo nia kan hriatte’n Final an khel a, an Champion leh mai thin. Engvang nge ni ta ang le?Football lam zirmi (expert) ni kher lo tan pawh he zawhna chhanna hi chu rilruah a lo lut ve nghal mai a. Mahni hmuh leh hriat phak tawk atangin chhan tum ta ila. “A che che sih hlawkah” tih ang deuh khan “A hua hua chu in ni mai” Football-a hmasawn tur hian, Players, Coach, Manager leh Organising Body (Sporting Club/Football Sub-Committee) te hian mawhphurhna hran theuh kan nei a, tun tumah chuan Players bikte’n kan TIH TUR leh TIH LOH TUR te lo tarlang dawn ila.
i) MAHNI THUNUNNA : Kan veng Football players thenkhat (a tam zawk mah) hi chu an Discipline a tha lo a ni satliah mai lo va, Discipline hi an awmzia an hre fuh lo hrim hrim niin a lang. Coach emaw, players dangte emaw thlir mail ova, mahni inthunun (Self-discipline) hmasak a ngai. Thununna hnuaia awm thei lo mi chu eng kawngahmah a hlawhtling ngai lo. Field chhung leh pawnah mahni inthunnunna tha tak kan neih hma chuan kan inkhelhnaah hian kan hlawhtling ngai lo vang.
ii) TUMRUHNA/INPUMPEKNA: Football khelh hi intihhlimna ang vel chauh va ngai kan Veng Football Players zingah hian kan la tam mai. Peih chang changa chauhva Practise tur emaw kan ti a, kan tum a hniam tlat. Tournament khelh dawn pawha Champion tumna tak tak rilru pu miah lo, khel ve mai mai kan la nit lat hlawm. Tournament khelh tum ve si, chhuanlam kan ngah lutuk te hi inenfiah a tul khawp mai. Practise aia ngaihpawimawh, kan eizawnna leh tul tak tak ni si lo, kan ngah lutuk. “Birthday, Pass lawm, Mo lawm” tih vel, kan tel lo pawha miin an tih theih reng hi kan ngai hlu lutuk a, “Veng/Club aiawha khel tura thlanchhuah bik kan nihna hi kan hrethiam ngai lo. Hetiang rilru pu chung ringawt hi chuan hlawhtlinna hi a la hla deuh mai thei.
iii) NUNGCHANG/RUIH THEIH THIL: Tournament khelh dawn apianga Veng mipuite khawngaihna dil a, VEHBUR khawn thin kan ni. Players te hian kan theihtawp kan chhuah phawt chuan veng mite hian min tanpui an inhuam. Chutih a hnekin, kan Football pet tur leh kan Ballboot bun tur leina tur pawisa thawhtute hmaizahna nei map lova khawlaia kan han rui thle mai thin hi chu veng mipuite rilru hi a NA thin asin. Chak loh apiang maia “Chumi khami chu nizanah a rui em a nih kha” tih te “Practise an kal thatchhe em alawm” tih chhuanlam ngaihthlak hi veng mipuite hian an kham tawh asin. HARH A HUN TA. State aiawh, Department Players leh 1st Div. Players kawl ve reng chunga hma kan sawn thei miah lo hi Players zawng zawngte hian kan mawhphurhnaah i ngai theuh ang u.
Heng kan sawi bak pawh hi Players te hian tih tur leh tih loh tur kan ngah ang. Mahse heng chauh pawh kan hriat leh kan zawm hian hmasawnna chu a ni reng reng. Chutih rual chuan Players te in lo thawhrim tawhnate kan hriatpui che u. Tih tak meuhvin, tih tak meuhvin players te hian i bei ang u. CHAMPION NO MAWI hi kan ban phakah hian a awm ve reng a, mi veng ta tur a ni bik lo. Mahse a dawngtu turte hian a MALSAWMNA dawng thei zawng hian kan nung lo mai zawk a ni. “Miin a theh apiang, chumivek chu a seng bawk dawn si a” (Galatia 6:7) tih ziak a ni si a.