Kum 2012 kum chanve chu kan hmangzo a lo ni leh ta reng mai a, infiamna a kan veng thalaite dinhmun ka hmuh dan leh ngaihdan ka han tarlang ve dawn a ni a, tu pawi mah kan sawi lovang chu maw.
1.Football : Kan hriat angin kan veng hi tunhma atang tawhin Football-ah Chanmari nena veng hran kan nih hma pawhin Player thawhchhuak hnem kan lo ni tawh thin a. Chanmari West veng alo pian atangin Sporting Club leh Club thenkhatte pawh din a lo ni tawh thin bawk a, vawiin ni thlengin Sporting Club chuan Football chu a la enkawl chho ve zel a. Kum hnih thum liam ta atang khan kan vengah Football hi thi tawh ni angte pawhin thil chik mite chuan an lo sawi thin a, a chhan nia lang chu Local Football Tournament siam a ni ngai ta lo bawk nen kan tlahniam tih chu phat rual a ni lo. Kum 2012 alo inherchhuak a, Mizoramah Football thlipui rawn tlehin kum tir atangin min han nuai tan ta pang mai a, Red Ribbon Inter – Village Football inelna in bultan a ni a, a zawh veleh Central YMA Football in a han chhunzawm leh a. Kan hriat leh hmuh angin veng dangtena min hmuh dan chuan kum 4 liamta khan Chanmari West aia tha an awm lo an ti thin, mahse Round of 16 pawh veng ang a intihsiaknaah kan pel thei lo, (Club intihsiakna ni lovin) a chhan chu kan veng Player thate hian zuk leh hmuam, ruihtheih thilah insum theihna an neih loh vang a ni.
Veng anga inkhel awmah kan veng aia entu nei tha hi Aizawl, Mizoram khawpuiah hian an awm kherin a rinawm loh. Mahse kan Player-te khawsazia leh nun danin mipuiteah beidawnna nasa tak a thlen nite pawhin a lang. Veng mipuite beisei loh leh rin loh lutuk maiin CYMA Tournament-ah Final hial kan han thleng kha chu vawiin thleng hian kan Player dinhmun en chuan Pathian khawngaihna leh vanneihnain min awmpuina leh entu mipuite thawhrimna, nisa leh ruahpui hnuaia inkhel, thulh miah lova phur taka khuang leh rimawi chi hrang hrang nena an thawh chhuah vang kan ti lo thei lovang.
Amaherawhchu tuna kan Player-te hian kum hnih khat bak an khel theiin a rinawm tawh loh va, chuvang chuan naupang zawk leh tha zawk kan neih neih theih nan Local Tournament arang lama siam hi kan hmalam hun thlir chuan a pawimawh hmasa ber a ni. Kum 5 liam ta a, Branch YMA huaihawta Local Tournament neih thin Pi Tlangkhumi leh Tv. Lalruatkima Memorial Football Tournament Section inelna kan neih thin anga chhungte hriatreng nana lawmman tur Trophy leh pawisa fai thawh thei awm leh ta ang se chuan kan hmabak chu a eng ngei ang.
Infiamna enkawltu Sporting Club kan nei tho pawh kan ti thei a; amaherawhchu, Club sum leh pai neih chhunte Club tana hman a ngai zel si a, sum leh pai nei lo, harsa tak a nih avangin an kuta dah theih ngawt bik a ni lo tih kan hriat a tha hle bawk.
2.Volleyball : Sporting Club kaihhruainain Club tha tak kan nei chho mek a, mipa 1st Div. leh 2nd Div. kan nei mek a, tuna 1st Div.a khel mek te an khelh theih loh huna an aiawh tur 2nd Div. kan nei thei hi a lawmawm hle. Chutih rual chuan Sporting Club chuan Club enkawl bak Vengpum huap Tournament han siam dawn se Football ang tho khan sum leh pai a neih loh avang leh Club tana sum neihsa hman nghal zel a ngaih avangin thil awlai a ni lo tih erawh kan hre awm e. Vengchhung mi inphal Sport lam tui emaw, tui chiah lo pawh veng tana Tournament siam a nih theihna tur kawng sialtu awmin hma han la ta se chuan Player tha zawk kan chhar chhuak ngei ang.
3.Basketball: Court puitling nei chiah lo mah ila, siam tan tirh kha chuan an han phur chho ve viau va, mahse kan khel tak tak peih lo niin a lang.Tlai lam inkhel tur kha chu an han awm ve thin kha a nia, tunah erawh football khelhnan hman a lo ni ta. Court enkawltu mumal awm loh vang leh Club ding awm loh vangte pawh a niin alanga tumah indem thei kan ni pawn a langlo. Kumin YMA Tournament kan thlir chuan Player kan lo nei tha hle tih erawh kan hmu awm e. Kan veng Player tha ten veng dang Club tha tan an khel chhuak nual tih erawh kan hriat atan a tha awm e.Sporting Club emaw YMA hruaitu lamah a tuipui leh a game kalphung hria hma han la thei nei ila chuan hma kan sawn ngei ang.
4.Badminton: Tunah chuan Badminton Club tha tak leh hmala chak tak kan lo nei ta a, a lawmawm hle. A nawlpuia a khel thinte kan hmuh thin dan chuan mihausate infiamna leh thlan tih tlakna game tiin an sawi fo thina, a dikna chen pawh a awm awm e, amaherawhchu a ni vek kherlo tih erawh an hmalakna atang hian a hriat theih awm e. Competition naupang atanga puitling kum upa lam tana an han buatsaih atangte hian nakin lawka veng hming ti tha tur Player naupang zawk an chher chhuah ngei arinawm.Section hrang hrangte tan inelna ropui leh lian zawk buatsaih chho zel theih nise a duhawm hle.
5.Table Tennis: Kum engemawzat liamta kha chuan Mizoram pum pawh Player lang pha emgemaw zat kan lo thehchhuak ve tawh thina, a khelhna hmun leh Board kan neih that tawk loh vangte pawh a ni kan ti thei ang. Board thar leh khelhna hmun tha zawk ngaihtuah theih nise a duhawm hle.