'Masangtea 15 kan nei thei lo a nih pawhin 10 tal nei ngat ila chuan..; Chuti a nih loh pawhin section inkimin panga tal pawh ni thei se'
A la theih loh fo a nih chuan pahnih chu ni theih hram se a duhawm ngawt mai, hmasawnna a zuana zuang mai lovin a thlawhin a thlawpui pha thovin ka ring. A theih ngang lo a nih pawhin vui thei kan ni lo.
Pakhat chauh pawh hi; YMA AW-ah ngat phei chuan 'active' lutuk avanga ban ngai awmchhun a ni hial ang. Heti ang hi thil thleng thei lo tura ngaih a nih laiin, 'The Big Boss' Masangtea'n a thlen tir thei.
2008 khan YMA AW editor-ah zingkar nei lo Pu Lalnunthara Sailo an ruat a, circulation manager-ah Tv Jacob "Boss" Lalrinsanga ruat a ni bawk. Hemite pahnih hnathawh dan mawlh mai hi...
Hmanhmawh lo takin editor-in zirtawp zan dar kua vel atangin YMA AW-a thu chhuah tur a chhu tan. Tlai dar 5 vela chaw ei kham tawh Masangtea tan chuan zan dar 8-ah ril a tam leh hman.
Mahse, thingpui hmeh tur chungchangah dar 8:30 vela zanriah ei editor a thu ber a, zan rei thlengin a ril a tam ve tawh si lo va, dar 9 vela mu thin Boss lah dar 11 tlang thleng thlengin YMA AW vangin a meng rei.
"Eng vangin nge YMA chanchinbu avanga meng rei 'The Big Boss' hi ei tur tam tawk leh tuihnai tha kan chhawp loh."
Zan lam harsatna chu ngaihtuah zui atan dah phawt ang. Harsatna chhah ber mai, inrinnia thleng, chhungril lama inhmuhthiam lohna mawlh mai hi..
Pakhat zing dar 6-ah a tho daih tawh; dar 8:30-ah chaw a ei fel a, thu khaw muang ve ngial mah se chhungril lama turtu lian lutuk avangin a teihawi rei thei lo. Zirtawpni a intan atangin Masangtea thinlungah YMA AW bak a awm lo.
Inrinniah Lois Bet-in an chhut turin a dah a ngai a, tlaiah a lam leh a ngai. Chutah agent hnenah a sem darh bakah, sub agent hnenah a sem zui leh zel a la ngai cheu.
Amah delh rittu leh a thinlunga turtu lian tak avangin inrinni tukthuan ei kham a nih tawh chuan YMA AW chhutna, editor inah a kal lo thei lo. Mahse, mihring chiai lo zet nen an inhrawn miau a, an tum dan leh hmalak dan a in-zu-ra thei lo chiang em em.
Zing dar 9-ah a ngainat em em PENDRIVE kengin editor inah Masangtea'n chhut fel tawh lak chhuah a tum a, a lo la tho lo. Kaihthawh mai chi a nih loh avangin Boss chuan section fang kual leh rihin, YMA hmalakna hrang hrang a en lawr.
Chumi hnu chuan editor inah a kal leh. Chaw hma dar 11:00 a ni tawh a, editor a lo tho deuh chiah a, an varanda-ah zing thingpui a lo in. Zan lama an chhut zawh hman loh avangin nakin deuhah i rawn lam dawn nia tiin an inthlah leh.
Boss chuan YMA hruaitu thenkhat a kan kual leh a, mahse, YMA AW-a a mawh-phurhna a la hlen si lo. Rilru pangkhing deuh chungin a tei ruk ruk a, dar 12 pelh hnuah a thinlunga awm lian ber editor inah YMA AW chhut zawh tawh lam tumin a kal leh ta.
Editor chuan a dawrah zial pak khu tual tual chungin hmanhmawh lo zetin inleng a lo kawm a, mimal hna lamah buaina a neih avangin zan lama chhut sa bak a la chhut belh hman lo tih a lo hrilh. Boss ngaihdan a pel deuh nge hmun dangah kal duh tawh lovin a nghak ta tlat a.
Editor lah chuan a hmanhmawh phah der bawk si lo. Tlai dar 3 a ri tawh a; editor chuan zan lama mi bak a la chhut belh hman lo. Boss lah a helhhawlh tawh bawk si a, chhut tur ber keng chuang lovin a chhutna hmun Lois Bet-ah a han kal ringawt a, rei tawk fang thuin dawr thuthlengseiah thang khat vel zet chu a han muthlu.
A thim deuh thut thut tawh tiin Editor dawr lamah Masangtea a let thla leh a, editor chuan thil awm dan chu ning tawh hle mah se a tilang bik lem lo va. Editorial ziah chiah a hmabak tawh tih hrilhin Boss ngaihdan a ni bik tawh lo a ang hle.
Tichuan, editor chuan editorial chu a ziak zung zung nghal chuang lo va, tlai dar ruk a ri deuh der. Editor chuan Boss muthlu chu sawi harhin a dah theih tawh tih a hrilh a, phunnawi miah lovin Boss chuan Lois Bet a panpui a, vawi li a lamnaah a hlawhtling hram a, tum hnih chiah a muthilhsan.
Heti ang hian 2008 inrinni apiangin hun an hmang a, pakhatin a zo tlai thei bawka tlaiah lam tawh ang a ti lo kum tluan a, pakhatin a rawn lam hma thei sia kan zo hma deuh teh ang a ti chuang lo kumtluan niin a hriat.
Tichuan 2009-a editor turin Pu Lalnunthara Sailo bawk an ruat leh a, kum hmasaa kal kim thlap Masangtea erawh ruat nawn a ni ve ta lo. Eng vang nge tih hi chhui fe tham a nih laiin, a chhan hria U Nuntharate tan chuan sawi chhuah kher a tul lo.
Masangtea pakhat chauhin thiltih sawi hmawr hawnna lek a ni a, amah hlir 15 nei ngat ila chuan aw....
Inkhel leh intlansiak
European football zinga Mizote en nasat leh ngaihven ber English Premier League hmawrbawk a hnai tawh a, zanin hian Manchester United chuan inrinni zana khel Manchester City dinhmun hre chungin Aston Villa an mikhual dawn.
City-in Norwich mualah an khel a, an chak chuan United aiin point hnihin an hniam dawn a, Red Devils-in point an hloh a nih chuan City-in champion thei turin hun tha an nei thei. A chhan chu April 30-ah City-in Etihad Stadium-ah United an mikhual dawn a, tunah hian goal difference-ah an tha zawk.
Zanin dar 8:30 atangin United leh Villa-in an khel tan ang. Alex Ferguson-a team hian April 22-ah season tawp lama khawng tak Everton an mikhual leh dawn a, hei hi a pawimawh hle ang. City an tlawh hnuin Swansea an mikhual ang a, season kharna May 13-ah Sunderland mualah an zin chhuah a ngai bawk.
City-in April 22-ah a mawng phah Wolves tlawhin, United an mikhual zawh hnu May 6-ah season tawp lama che tha Newcastle an tlawh a ngai a, May 13-ah QPR mikhualin season an khar ang.
Season liam ta khan United-in a vawi 19 nan English title lain, 1990 atanga Liverpool-in title 18 laa record an kawl thin an khum fel a, a vawi 20 nan champion turin an dinhmun a tha. City hian 1968 hnuah English title an la leh ngai tawh lo va, 1992-93 season atangin Premier League kalpui a ni a, kumin hi season tawpa title inchuh zinga an tel hmasak ber a ni.
Spanish league-ah Real Madrid-in kum thum a zawna champion tawh Barcelona kut atanga title laksak tumin Catalan team lakah hma an hruai a, an hmahruaina erawh ngaihthatpui tham a ni bik lo.
Serie A-ah Juventus nge champion lai AC Milan champion nawn leh dawn tih a chiang lo em em a, point khatin Milan lakah Juve an sang a, inrinni zanah Milan-in an mikhual Genoa an hneh chuan point hnihin an sang ang. Mahse, zanin dar 6:30-ah Juve-in Cesena mualah an khel ve leh dawn.
Vawiin chhun dar 12:30 atang hian 2012 F1 championship round thumna Chinese Grand Prix an tlan dawn a, kumin hi chak tur sawi lawk harsat kum niin an sawi. Chutih laiin season tir atangin Mc Laren car a tha hle a, mahse, Mercedes GP-in danglam deuh hleka an car thla hma an siam avangin Shanghai tlankawnga inbuatsaihna an neihah McLaren nen an inel tawk a, Mercedes car hian inhnialna a chhawk chhuak nasa hle.
An tlan hnuhnun ber Malaysia-ah ruahsurin a tibuai a, beisei loh thil thleng zuiin Ferrari driver Fernando Alonso a chak ber a, pahnihnaah Sauber khalhtu, Ferrari hual Sergio Perez a thleng. Mahse, Alonso chuan an car-in hmasawnna lian tham a nei lo va, China-ah atan chet that zui a harsat turzia a sawi.