ZMT : Pi ZAMANTHANGI
Ed. Bd : I pian leh murna leh i chhungkaw dinhmun, min hrilh thei em?(Inthlan hma a i chanchin ziahna kha neihsa kan nei, i belh duh chuan ziah belh la)
ZMT : A awmsa kha ka ring e.
Ed. Bd : AMC Ward No. VI Councillor ni tura thlan tlin i ni tih i hriat velah khan enge i rilru a lo awm hmasa ber?
ZMT : Pathian khawngaihna/hnathawh a ni ang tih ka rilruah a awm hmasa ber.
Ed. Bd : Politics hi i tuipuina a rei tawh em? Engchen chiah nge experience i lo neih tawh?
ZMT : Politics hi ka tuipuina a rei tawh a, tuna mi tam takin kan hriat dan politics nilo (Ram leh khawtlang inrelbawlna tha politics zawk hi) experience sawi tur ka nei lem lo. Political Party-ah MPC Women Wings Hqrs-ah GS hna te ka lo chelh tawh a, rilrua Politics ka lo tui ve nachhan chu ka naupan laiin hun rei tak chhung ka pa hi VCP niin kan in hi khawtlang rorelna hmun ber a ni thin a, ram leh hnam, khawtlang veina rilruah a lo intuh ve a nih ka ring.
Ed. Bd : In party chhungkua thawhhona a tha tawkin i hria em? Inthlan dawn leh hnuah i awmna party hruaitute leh member te’n an puibawm tha tawk che in i hria em?
ZMT : Kan Party chhungkua thawhhona tha tawkin ka hria. Min puibawm tha hle a, Party hruaitute leh worker te an fakawm ka ti takzet a ni.
Ed. Bd : He dinhmun a ding tur hian i lo tum lawk ve hrim hrim em ni? Chhungkaw Nu ber ni chung chuan Ram leh Hnam tana tha taka thawh a har ve viau lawng maw?
ZMT : Tum lawk lo. Party leh Mipui te hmangin Pathianin he dinhmuna ding tur hian min koah ka ngai. Nu ber ni chunga Ram leh Hnam tana tha taka thawh chu a harsa viau ang. Mahse, harsatna paltlang lovin hlawhtlinna a awm thei lo. He dinhmuna min dahtu Pathian hian min hruai zel ang tih ka ring.
Ed. Bd : I dinhmun hi opposition lam nisa in i awm a, i ruahmanna leh tum danah harsatna a thlen theih dan awmin i hria em? Lo awm ta se engtianga hmalak nge i tum ang?
ZMT : Engemaw chenah harsatna chu a awm thei ang a, amaherawhchu Sawrkar hi dan chunga leng a ni lova, mipui te ta, mipui te siam, mipui te tana thawk tur a ni a. Chuvangin opposition ni mah ila, mipui te nen Ward tana tha tur ruahmanna kan siam te tihlawhtling ngei turin theihtawpchhuah ka tum ang.
Ed. Bd : ‘Kan ram hruaitute hi party worker te hian an zarbuai nasat thin avangin hna pawh an thawk tha theilo’ tih sawi a awm fo mai a, hei hi dikin i hria em? Enge i hmuh dan?
ZMT : A vaiin dik vek lo mah sela, dikna chen chu a awm ngei ka ring.
Ed. Bd : Ward No VI hmasawnna tura hnathawh tur sem chungchangah i awmna party mi leh sa i duhsak bik ang em? A tam zawk hi hetiang hun harsa taka lo nghak ve tang tang an ni thin si a, duhsak bik lo la lungawi ta lo se i tuar ngam meuh ang em?
ZMT : Thlan tlin ka lo nih takah chuan mipui zawng zawng ta ka ni a, mipui zingah a phu te leh duhsak ngei chi an awm ngei ang a, Party mite chu Pathian leh kan Ram Tan titute an ni a, hna tha taka ka thawh chuan a lawm ber ber te an nih ka ring.
Ed. Bd : Ward No VI chhunga veng dangte chu an harsatna kan va hriatpui chiah lova, kan veng bik tana hmasawnna tur hian engtianga hmalak nge i tum?
ZMT : Vengchhung hmangaihtu tam tak an awm a, hmasawnna tur ruahmanna hmasa tur leh hnuhnung tur kan sawi ho ang a, hma kan la ho turah ka ngai.
Ed. Bd : YMA te’n kan buaipui em em, ZAWLBUK chungchangah hian rilru i lo seng ve tawh ngai em? Engtianga chhunzawm nge tha a i hriat? A senso tur sum leh pai hi Ward fund emaw thil dang atang pawhin hmuh theih dan awmin i hria em? Min hlawhtlinpui theih i ring em?
ZMT : Mahni tawkah lo seng ve fo tawh thin e. Miten Hall tha an neih theih chuan keini Veng pawh hian kan neih theih ve ngei ka ring a. YMA hruaitute nen pawh kan la sawi ho ang a, Ward Fund atang lo pawh hian hmuh theih a nih ka ring a, Pathian zarah kan tih hlawhtlin ngei ka beisei.
Ed. Bd : Councillor i tling hi kan lawmpui che a, Ram leh Khawtlang tana i thawhna turah duhsakna sang ber kan hlan a che. Khawtlang mipuite hnena chah duh i nei em?
ZMT : YMAAW Editorial Board chungah hun tha tak min pek avangin lawmthu ka sawi a, kan ram leh khawtlang hmasawnna turin mipui te rilru leh tih takzeta min tawiawm turin ka sawm tak meuh meuh a ni