- C.Chawiliana
2. Ei leh in : Ei leh in kawngah chuan naupangin upa an zah thiamin an zai an ngai thin hle. Ram kalnaah te, khawchhunga ruaithehnaahte upa zawkin an bar hma chuan naupangin an bar khalh ngai lo. Ei mai theiha chawhlui an peih vek hnuah, “Khai le, upain han hliam hmasa rawh u le,” an ti thin a. Upa bar hnuah chauh naupang zawkte chuan an bar thin. Aia upa bar khalh chu mi hmuhsit an ni a, ‘mi vir’ tiin an hmusit hle thin. Ei leh bar thilah mi hmuhsit nih an tum ngai reng reng lo. An chaw chhunkhawm lai chu chawk kuain chawhmeh an neih chu chhungin an ei thin a. Mahni hma zawna buh leh sa chu an ei bik a, midang hmaa sa va lakte leh sa dap dun dun an duh ngai lo, thil zahthlaka ngaih a ni. Ei leh in lama khuk huam huam hi an duh ngai reng reng lo.
Pi leh pu huna an thupui ber pakhat chu ‘sem sem dam dam, eibil thi thi’ tih hi a ni. An thil neih ang ang an inpe tawn a, mahniin an thil neih an pumbilh mai mai ngai lo. Tam a tlak changte hian lal leh upaten ei nei lote tanpui nan buh neite zem an hawlh bung mai a, buh nei lote tan a thlamuanthlak hle thin. Tumah buh hak chhamin an awm ngai lo.
3 Hnatlâng : Pi leh pute hunah khan hnatlang an ko fo thin a. An hnatlan tamna ber chu Lal in sak te, zawlbuk sak te, tuikhur hiah te, kawng siam leh sahte a ni thin. An hnatlannaah chuan upa zawk rorel ang zelin naupangten hna an thawk thin. Tumah zelthel tum an awm ngai lo, a thawk tam ber nih an tum theuh thin. Upain, “I chawl tawh ang u” an tih loh chuan anmahni thuin an chawl mai ngai lo. An hna an thawh zawh pawhin upa thu lo chuan an haw mai mai ngai lo. Upain, “E, in thawk zo ta a, i haw tawh ang u,” an ti a, an haw chauh thin. Hnatlannaah an tlai ngai lo va, haw hma bik pawh an tum ngai hek lo.
4. Tawngkam : Tawngkam an hman chungchangah pawh an fimkhur hle. Mi pawi sawi an hlau hle. Aia upa zawk hmingpumin an ko ngam ngai lo va, an biak dawnin pitar leh putar chu, “Ka pi, ka pu,” tiin an ko va, an nu leh pa r ual chu “Ka nu, ka pa” tiin an ko leh mai a. An u rual chu “Ka u,” tiin an ko mai thin. Chutianga mi an koh hmasak loh chuan an mawl biak ngawt ngai lo. Loh theih lohva aia upate an tirh dawn chuan, “Tirh rual loh hnial rual loh, chumi khami kha min tihsak hram ta che,” emaw min tihsak hram thei ang em emaw an ti thin. ‘Tawngkam thain sial a man’ tih te, ‘Lampui chang khatah mi an be chhe ngai lo’ tih thufingte hi hre ranin mi hauh te, mi rel te, mi sawiselte an duh ngai lo. Tawng uangthuang lam an sawi dawnte hian ‘Khuavangin beng lo chhu ngawng sela’ tih te, ‘Tawng thu chhia ni suh sela’ emaw ‘Tawng pachhiat ni suh sela’ emaw an sawi hmasa tê tê a; tichuan an thusawi duh tak chu an sawi chauh thin. An aia upa kiangah tawng chaltlai leh mawi lo an chhak chhuak ngam ngai lo.
5. Tar zahna : Tar kan tihte hi an vanglaia kan vawiin khawvel atan theihtawp chhuahtute an ni a, tuisik mai kan nih lai atanga thi leh thau pawlha kan khawvel min dinsaktu, kan hrehawm hlauva an theihna zawng zawnga sulsutu an nih hi hriain pi leh pute khan tar an zah em em thin. Ngalfim, tar khup bih leh khup thum hmua dam tura malsawmna tawngkam kan hriat atangte hian upate an dah nep lohzia kan hre thei ngei ang. Sulsutu mai an ni lo va, chhungkaw phuarkhawmtu an ni. Nu leh pa, pi leh pute tiduhdahtu leh hmusittu chuan malsawmna a dawng tluantling ngai lo. Upate hian malsawmna an thutbet a, anmahni enkawltuten anmahni avangin vanneihna nasa tak an dawng thin a ni. Kawng thenkhatah tunlai zia man pha lo mah se, tar an nih avanga â tura ngaih erawh a dik lo. Rilru leh ngaihtuahna chawl lova hmang rengte phei chu tar at an nei lo va, an upat zawh poh leh thil an tawng tam a, thil an hre tam a, an fing tulh tulh zawk a ni. Rilru so bulh an pel a, thluak fim chin tih an hlawh a, ‘hnam ro hlu’ an tling a ni. Upa hnenah finna a awm a, khua reiah hriatthiamna tih zawng zawng an nei a ni.
Chuvangin tarte hi duat an phu a, tar rimchhia ti mai mai lovin, “Ka pi chu, ka pu chu i hmel a tha, i fel, i fing, i hrawn a nuam” tiin tawngkam tha an bulah hman thin tur a ni. A theih phei chuan kan zahna kan lantir fo thin tur a ni. “Lu-a kelsam to te hmaah chuan i ding zel tur a ni a, tar hmel chu i zah tur a ni,” tih pawh Bible-a kan hmuh hi.
Hnam fing leh ropui zawk apiangin upate zahna an nei lian hle. Vawi khat chu Grik putar pakhat hi ennawm en turin a kal ve boh boh a, Grik-ho thutna lamah a va kal a, an lo ngawi thuap mai a (putar zah vangin). Rom-ho zingah a kal ve leh a, putar zah vangin an lo ding thup thung a. A hnuah chuan ‘Grik-hovin finna thu an hria a, Rom-hovin finna thu chu an nunin an entir a ni,’ an lo tih phah ta hial a ni. Juda-hote phei chuan, “Lu tuak chu ropuina lallukhum a ni a, felna kawngah hmuh a ni ang,” an ti a. “Tlangval ropuina chu a chakna a ni a, tarte mawina chu an lu tuak a ni” an ti bawk.