Zo nun, zo nun mawi,
Tap tapin ka au ding zo si lo;
Zo nun, zo nun mawi,
Liam lovin la cham rih hram rawh aw.
Hmanlai kan pi leh pute hunah khan nun dan mawi an hman thin, tunlai thangtharte entawn tlak tam tak a awm. An nun kha tlawmngaihna te, huaisenna te, rinawmnate leh aia upa zahnate khan a vet chhuak vek a. An tlawmngaihna te, then leh rual inzahtawnna te, an inthenawm khawvennate bakah khawtlang tana a tangkai zawnga an nun dan te, a tha zawnga an huaisenna te, an taimakna te, an rinawmna leh chhelna zawng zawng khan Zoram a tihmingmawi a, a huhova chen a nawm phah bawk a ni. Heng an nun hlu tak avang hian a ni awm e, Bawrhsap hlui Major Mc. Call, ICS (1931-43) phei kha chuan ‘Hetiang khawpa nun tha leh ropui hetiang hnam mawlin an rawn pu chhuak thei hi, an hmanlai nun hun eng emaw vel lai khan hnam ropui zawk China ang zingah an awm tawh a ni ang e,” a lo tih hial. Aia upate zah chungchangah chuan China-ho leh Japan-ho hi khawvelah an hmingthang lawr hle a, an nun mawi tak chu khawvel hnam dangten an ngai ropui hle a, an nunphung chu ‘Eastern Culture’ an ti hial reng a ni. Kan pi leh pute huna an nunphung, aia upate an zahna leh hawihhawmna enin China-ho leh Japan-ho aiin an hniam bik hauh lovang le.
Tun tumah hian an nun peng hrang hrang kan sawi hman dawn lo va, aia upa zahna, an nun peng khat chauh kan sawi dawn a ni. Changkang zawk leh fing zawka inngai tunlai Zofate tan inenfiah nan a tha ngei ang.
AIA UPA ZAH : A hming ringawt pawh hi a mawi hle. Pi leh pute huna an inzirtir ngun ber pakhat a ni reng a. An inzirtir ngun ang ngeiin naupang zawkten an aia upate an zah thiam reng a ni. He nun mawi tak zirtir tur chuan mipa naupangte thingnawi fawm rual an nih veleh Zawlbukah an thing fawm zan tin an keuhtir ziah thin. Anmahni enkawltuten taimak leh thuawih an zirtir tan a ni. Naupang lamin an tih tur an tih loh vaih chuan na takin val upaten an hrem a, thu awih lo chu dinhualin an “sih sawi” hial thin. Chuvangin naupang thuawih lo chu an zilhhau mai thin, upa zawkin an tirhna apiangah, zan thim kar leh ruah sur bur bur karah pawh an tirh phawt chuan châk zawk ang maiin an kal thuai thin. An aia upa zawkte tirhna chu hnial thiang lovah an ngai tawp mai a ni.
1. Ram lamah : Pi leh pute hunah chuan a huhova ram lama kal a awm thin. Ramhnuaia riahbuk sual a tul changin tlawmngaia thawk tam ber nih an tum theuh thin. Khaw en laia tih hman loh pawh ni se, a tul phawt chuan zanah riahbuk thing fawm te, hnah lak te, tui chawi leh chawhmeh zawnte hreh hlek lovin, châk zawk ang hrimin miten an tihkhalh hlauvin an ti thuai thuai thin. Ramhnuaiah chuan upate an duat êm êm a, upa ber phei chu hna hahthlak an thawhtir ngai lo. Zing thawh lamah aia upate thawh hmaa rawngbawl fel vek an tum thin. Miin an thawh khalh hlau reng rengin zan lamah an mu tam lo hle thin. Hmun hlauhawmah phei chuan zankhuaa thingtuah tlaivar zakte a ngai a, chutiang hunah pawh chuan thing chhawm nungtu nih theuh an tum thin.
Ram kalhonaah hian upate chu rit takin an kaltir ngai lo va, chhawk theih awm apiang chhawk zelin zang thei ang berin an kaltir zel thin. Kawng tluangah chuan a upa ber apiang hma an hruaitir a, midangte chuan an zui diah diah thin. Kawng pik leh tawn ngai apiangah chuan tlangval tlawmngaite bawkin kawng satfai turin hma an hruai thung thin.
Sa pela ram an chhuah changte leh sangha an tlangvuak changte hian upaten sa chhepin an sem thin, tumah duhsak bik nei lovin an sem thin. Upa zawkte thil semah tumah an vui ngai lo. Sapelnaah sa kah tur tam tak hmu mah se, upa berin thal a thlah hma chuan naupangin an thlah ngai lo. Tin, sa pawh a rualin kap sela, upa zawkin salu a chang thin, chu chu upa sakah an ti thin. Lo tur ennaah pawh a thleng hmasa an lal thin na a, an thlen rual chuan a upa zawkin an chang thin.
(Pu Chawia hian he article hi Literature Sub- Committee Chairman a nih laia a ziak a ni a, a sei tham deuh avangin, a la zo lo, a tha si a, chhuah zawh loh atan chuan a uihawm bawk si a, karlehah kan chhunzawm leh mai ang, Ed)