Khawvelah hian baihvai tak atanga dinhmun thaa chuang chhuak theite chanchin hi a ngaihnawn duh tlangpui a, hetiang mihring hi tam tak awm tawhin, an la awm zelin a rinawm.
Infiamna khawvelah pawh hriat tur an awm nawk a, Manchester United-in tun nipui player insawn theih hun chhunga an lak luh Portuguese striker Bebe pawh hi chung zinga mi chu a ni chiang a. United tan tun season chhung hian a inkhel miah lo mai thei a, mahse, Old Trafford-a a luh ruala a dinhmun tawn erawh he striker baihvai rei tak tak hian lawm lohna tur reng reng a awm lo vang.
United manager Alex Ferguson chuan TV-ah tak ngial pawh Bebe inkhel lai a la en ngai miah lo. Mahse, pound maktaduai 7.4 sengin kum 20 mi hi a lei ngam a, Portuguese third division aia sangah Bebe hian inelna a la hmachhawn ngai lo hrim hrim.
Bebe hi Portugal khawpui ber Lisbon daifemah chenna in pawh nei chuang lovin a tal kual vel mai mai thin a. A naupan hun chhung zawng kawtthlerah a rem dan apiangin chaw a zawng a, a remchanna hmunah Portuguese naupang dangte nen football an khelh bak tih tur dang a nei lo va, lehkha a zir awm tarlan a ni lo va, nu leh pa nei lo fahrah a seilian a nih thu erawh an tarlang nasa.
Third division club Estrela da Amadora chuan talent a neih hmuin an la lut a, he mi atang hian mihring khawsak dan phungin in leh lo pangngaiah a cheng ve tan chauh va. A luhna club lah hi an han pachhe ve mai mai khawp a, season liam ta khan suma an harsat luat avangin an player tha ve bera ngaih Bebe hi an zuar ringawt.
Estrela coach ni thin Jorge Paxaio-a sawi dan chuan : "Season liam ta khan club-in pawisa a tlachham em em a. Bebe hi hralha sumtuak mai kan tum a, Sum hmuhna mumal kan neih miau loh avangin kan dinhmun a chhe em em. England leh Europe club dangah euro 150,000-in kan zuar a, tuma'n an duh lo va, tute mahin he player hi an rim ngam lo va, a chhan chu level sangah football a la khel ngai miau lo va," tiin a sawi.
Bebe ngei pawh hian kumin January bazar hunah khan a khelhna club-in an zuar nasa hle tih a sawi bawk a. Hralhna tur an hriat miau loh avangin season tluanin an kawl a, third division club Estrela hian hlawh pek an harsat em avangin an chhuahtir ta ringawt a. Portuguese Premier League club Guimaraes chuan tun nipui khan sum seng lovin an la lut a, Bebe tan lawmna tham a tling.
Thawklehkhatah thil a danglam ta thut a. Guimaraes tana a khelh miah hmain, tunlai khawvela club ropui ber zinga mi United scout-te chuan Bebe an hmu chiang a, a hmain United assistant manager ni thin Portuguese Carlos Queiroz chuan Ferguson-a hnenah Bebe hi a lo sawi hmuh tawh niin an sawi.
Thla sarih kal ta vel maia euro nuai 1.5 senga an lei ngam loh Portuguese forward chu United-in pound maktaduai 7 chuangin an lei. Estrela-in hralh an tum laia an zawrhna sum let 50 dawna tamin English club lian hian an lei ngam a, a hrechiang apiangin mak an ti a. Mak ti leh lawm ber chu amah Bebe a ni.
Mihring a nih ve tan phat atanga vakvai reng reng leh fahrah taka hun hmang chho ngar ngar hian, season liam ta khan Estrela-ah kum khat chhungin pound 12,000 a hlawh a, lei rem a rap ve thei. United hian season liam ta chhung zawnga a hlawh ang zat kha kar khatah pein contract an ziahpui a, a hlawh punna pawh hi a tlem chhe lo hle a, nikum aiin a let 55 velin sum a hui hnem dawn.
Bebe hian hma lam hun duhawm tak tawng chhunzawm zelin; a vawi khat nan Portugal under 21 team-ah koh a ni nghe nghe a, kar liam ta khan a chen mekna England nen an inkhel a, hma lam hun eng lehzual nei thei dinhmunah a ding.
Amah lo kaihhruai tawh coach Paxaio chuan : "United-in an lei ta thut mai hian min barakhaih chiang em em a. Portugal-a club lian zawkah emaw Europe-a club laihawl ang velah chuan a luh mai ka beiseipui a, mahse, Manchester United-in an lei hi ka ring ngai lo. Chutih laiin United hian player tha chungchuang erawh an la lut si a ni," a ti.