Rafael Nadal leh Sebastian Vettel-te tan 2010 hi hriatrengtlak kum tha a ni a, football khawvelah hniam leh san lai nei mah se Lionel Messi pawhin kuminah hnuhma a hnutchhiah nep lo hle.
Kum 24 mi Nadal-an tennis khawvela hun a hman tawh chhunga kum ropui ber a hman thu a sawi a. Spaniard hi kum kal ta khan a che tha tawk lo a, vawi li a champion zawn tawhna French Open quarterfinal paltlang zo lovin a tla a, hliam nei zuiin tennis a khelh leh zelna tur nghawng hial tura ngaih a ni nghe nghe.
Nadal hian Wimbledon title a kawl lai pawh hum thei lovin hliam vangin All England Club-ah inkhel a hmachhawn thei lo zui a. US Open-ah a arh chhuak chuang lo va, kumin kum tir Australian Open-ah trophy a hum zo lo zui bawk.
Mipuiin a lak atangin beiseina an nei sang tawh lo hman viau a. Mahse, rin phak baka ropuiin a thiamna clay season a hmang chho va, Roland Garros-ah chungnung takin a champion a, a vawi nga nan French Open title a la. Wimbledon-ah a vawi hnih nan champion leh nghalin, vawi khat mah final a la thlen ngai lohna US Open-ah trophy a la leh a. Kum danga a la hlawhtlin theih loh Grand Slam trophy pathum nen kum a khar bakah, Masters title a la tha hle bawk.
Grand Slam title pakua kawl tawhin, Grand Slam palia champion kim thei mi tlem te zingah Nadal tel ta a, atan 2010 hi a hlu. Grand Slam champion ngun ber record kawl mek Roger Federer-a title lak zat 16 khum thei hial tura ngaih a ni zel a. Mahse, Nadal hian Federer chu amah aia ropui zawk a la ni tih sawi fanin mi ropui bik huanga mi a la ni lo va, hmabak a la neihzia chuang takin a sawi bawk a. Hma lam hun thui tak la neia ngaih a nih vangin a chungah beiseina sang tak a awm mek a ni.
Michael Schumacher nena an khaikhin thin kum 23 mi Vettel chuan mak ang reng takin a tum ram a thleng. Miten an beisei tawh loh hnuin Formula One championship season kharna Abu Dhabi-ah November khan pakhatna a ni a, F1 history thar ziakin F1 champion thei naupang ber a ni a, Red Bull-in drivers' leh contructors' title nen ropui takin season an khar.
German driver Vettel hi F1-a hriatna nei thuk zawkte chuan a chungah beiseina an nei reng tawh a. 2008 Italian Garnd Prix-a thil thleng avang khan Vettel hian talent tha bik a nei tih pholangin, world champion a nih zui ngei an ring. Monza tlankawng ruahsur hnuaiah Vettel-an F1 team zinga rethei leh te ber Toro Rosso car khalhin a intlansiak a, tute mahin um pha lovin khawvel a barakhaih a, F1 driver zinga tlankawnga pakhatna ni thei naupang ber niin kum 21 mi a ni.
Toro Rosso neitu, team lian zawk Red Bull-in la chhuak nghalin, nikum khan season tir lama Brawn GP car tha fal lutuk avangin a tawpah Vettel-an Jenson Buttun tluk zo lovin a pumpuia pahnihna niin tawp a khar a. Kuminah Red Bull-in car an nei chak a, season tluan thlirin tlan chakah tute mahin Vettel an tluk lo chiang hle a. Tum nga chauh pakhatna niin a tawpah champion hram mah se, vawi 19 an intlansiaka tum 11-ah pole position luahin qualifying-ah a chak ber a. Driver inel zinga vanduai ber ang hiala chhal ni chungin world title a lak hnuah meuh chuan champion phu bera ngaih a ni a. German driver ropui Schumacher thlak tura an hual "The Next Schumi" tia an sawi Vettel-a tan kum ropui a ni.
Football inkhawmpui lian South Africa World Cup kha hai der ta ila, Argentina-in quarterfinal an kal pel zo lo va, Messi-an goal khat mah a thun lo. Chuti chung pawhin kum 23 mi Argentine "Magician" hi 2010 Fifa award dawng tura thiar sin mi pathum zingah a la tel phak a. Ram hrang hrang coach leh captain bakah, football writer thlan bikten khelmuala a chet dan mit tlung reng mai an ngainep phal lo.
Tun kum chhung maia Barcelona tana Messi-a khelh dan hi a mak hial zawk a. kum kal ta phei kha chuan footballer chawimawina sang zawng zawng a dawng kim deuh vek a. 2010 chhung bikah hian vawi 50 a khelhah goal 55 thunin hattrick vawi nga a siam tawh a. Season kal mek 2010-11 season chhungin La Liga leh Champions League-ah goal 11 siamsakin, goal 21 a khung tawh a, khelh khatah goal hnih pai reng ang a ni. Ram tan a tum ram thleng zo lo mah se, kumin hi Messi tan chhinchhiahtlak a ni a, World Player of the Year award kawl mek mah se, hmasawn zawngin a thang zel a, a khel puitling tial tialin a teammate Xavi phei chuan : "Diego Maradona aiin a tha zawk," tiin tlang takin a sawi.
PANLAI NUN
Merama-a T.Sect
Tape ring tawkin ka lo play! Tluangtea'n va ring ve rawn ti, a ni lah taka, mahni duh khawp aia ringa tape lo play chuan midangin hriase kan lo tih vang mai mai a lo ni. Pu Vanneihtluanga'n 'Bengtulul' tih a rawn ziahah khan a chiang khawp mai. Pu Vaneihtluanga sawi takah chuan a hla phuah 'Engkimsiamtu', nalh ka tih em em, kan lo sak ve tawh thin ,a chang ka hriat kim tawh loh avanga dil kan tum, kan han dil dawn a, inthlahrung deuh in, mahni pawha kal ngam lovin ka thianpa Tluangtea nen kan tek chho a. 'Hei tu in nge?' kan han tia ZONET a thawk ve thin, an zin kual vela thil puang thin hi an lo ti a, an in kan hre chiang lo nge, ui in min lo bauh! Tet lai atanga ui hlau ta reng reng chu, ka siliper khai chungin kan tlanchhia! ka siliper thlauh min hrilh na'n Tluangtea'n 'heeei' ti chungin min rawn um zui a, Ka chhar hman lo! Hla vak pawh kan la tlan hman lo tihin Neuhof school a kan kalpui thin, ka lo duh rilruk leh ka lo zah ve em em thin khan, 'hei i siliper' a rawn ti mai chu! va zahthlak em aw! Kan in pek fel hnu chuan,Tluangtea hnenah chuan "I siliper i thlauh i tih khan engati nge min pek nghal mai loh?" Tluangtea lah chuan... kha.. kha ..ka tih kha i hre lo nih kha! Eee! Tluangte thirchia kan hralh leh hunah, ka pa te insakna thir bung kan hralh leh hun hunah ka sawm ve tawh miah lo ang che ka ti a" kan in hau ta, ani chuan 'nih leh min kalpui rawh i tihna ah ka kalpui tawh miah lo ang che' a ti ta mai si! kei aia naupang zawk bawk a ni sia, ka tih thinrim chuan a haw daih tak tak ang tih ka hlau si.'Tluangte thirchia kan hralh leh velah i duh ber kha kan lei tawh dawn nia' ka ti a a lungawi thei leh hram. Kan thirche hralh zawh khan kei chuan vaidawr, tuna Chanmari kawna Pu RK Sapa te dawr bulah khan Bundia kha ka duh tawk mai a, ani chuan Rosgula (Laal mohan??), vaiho dawr a sen thip thep ang hi lo ni in! 'Tluangte thirchia kan hralh leh velah i duh ang ngei chu kan lei tawh dawn nia' ka ti a a lunngawi leh thei hram. Chuan Pu Thanmawia te in chhak U RKA te inah kan in hruai thla a. Tluangtea chuan 'Ui an nei em?' Ka hre bik lo..'ka kal duh tawh lo!' Lo kal rawh. 'Nakinah ka thil ei duh i sawi dang leh daih ang' Teuhlo mai. 'A nih leh nangman zawt hmasa tawh rawh' an kawtkai ah chuan min bauh lo phawt..anneilo niang? an neih pawn a muhil niang! Awihawm loh mi ui an muhil ve ngai lo, 'Hmanah Pawh U Zauva te ui amuhil emaw kan tia kan TV en tur min um hrep tawh' Lo kal mai mai rawh....'aaaa.... nih leh' Ui chu an lo nei ngei mai! a lo muhil lo tak tak anih hi. A van pawi leh dawn tak em!! Tluangte tlanchhe rawh...! kan tlanchhe ta nge nge. U Zorama'n ama phuah ngei a hriat chhuah tawh loh 'I u RKa'n ala hria ang' atih pawh dil ngam ta lo chuan kan haw leh ta ringawt a.Tia'ng mai mai hi a lo nih hi, kan tet lai hringnun hi kan lo hman thin ni..A lo hmang nuam thiam thiam hi kan lo vannei mai mai dawn a lo nih awm hi maw!