Mizote hi thingbul lung bul bia a kan awmlai te, Tuipui ral atanga he Zoram an rawn vei a, Kristian a min rawn siamdan te, chumi hnua kan kal chhoh dan zawng zawngte han thlir kual vel ila, a lungleng zawng a han thlir chuan hmanlai kha a ngaihawm thei rum rum awm e.
Tunlai hun hi han thlir vel ila, lung awina tur hi he kan ram, kan vengah hian han sawi tur ting chu awm bawk mahse a vang i ti ve thin lo maw... Mahse kan boruak tawn mekah hian khua a la var thei a ni. Sorkarin ram siamthat an ngaihtuah a, zirna lamah Education Reforms an ti, vengtinah chumi siam puitling turin eng eng emaw VEC e.t.c. a ding bawk. Khawpui inrelbawlna turin Municipal an kalpui mup mup bawk nen. Presbyterian kohhran in zirna siamthat kalphung an zir mek bawk. YMA te pawhin kumpuan ah Khawtlang Nun Siamthat puangin an kalpui mup mup bawk si.
Ka’n thlir vel a, lungawina tur hmuh hlan ka nghakhlel. A maherawhchu hetianga a thu ringawt a kalpui hi chuan awmzia hi a nei leh ngut angemaw ka ti thin. Chuvang chuan kan thil tih theuh hi Kristian kan nih ang hian a te emaw a lian awmaw pawh nise Pathian tan, kan ram tan, kan veng tan, kan chhungkaw tan leh keimahni theuh tan a ni ti chung hian a taka kan thawh a kan tih chuan khua a la var ang. ‘HAN THLIR VE TEH’.
Kawng thar Aragon-ah Lorenzo leh Pedrosa
-Ti-a
Thil thar hrim hrim hian hlutna hran a nei a, ngaihven a hlawh bik thin. Tun pathianni tlaia an tlanna tur Aragon tlankawng hi tute mahin an la hman loh niin, MotoGP Championship round 13-na a thleng dawn a, kumina Spain rama an intlansiak vawi thumna tur a ni a, tun dinhmuna title chuha inbei mek chu Spaniard rider pahnih Jorge Lorenzo leh Dani Pedrosa-te an ni.
Spanish fan an phur a, Spanish rider pahnihte an phur bawk. MotoGP fan-ten Aragon-a thil thleng hmasa ber hmuh an chak ang bawkin, rider-ten chak hmasa ber hlutna an hrethiam vek bawk a, history-a chuang langsar bik tur an ni dawn tih hrethiam lo rual an awm lo.
Kuma vawi 12 tlan tawhah Fiat Yamaha rider Lorenzo chuan chungnung taka bike khalhin, vawi sarih pakhatna a ni a, tum thum pahnihna niin, vawi khat pathumna a ni bawk a, lawmman semna dawhsan (podium)-ah a la lawn ziah a, hetiang taka che fuh tluang tha leh nghet hi an tam lo. Mahse, an tlan hnuhnun tum hnihah tluk loh a nei a, Repsol Honda khalhtu Pedrosa a ni.
Honda-in hma a sawn rualin, inbeihna tak taka tlo zo lo tia sawisel thin Pedrosa chuan 2005 kum 250cc-a a theihna ropui tak, a tawp rat thlenga pakhatna nih tum thin a nihzia a lantir mek a. Indianapolis leh Misano-a pakhatna a nih zawn hnuin tunah hian an ram leilung ngeia chak ber nih a, a zawna tum thum pakhatna nih a tum mek a. An tlan hnuhnun tum hnihah rider inelnaa hmahruaitu Lorenzo nena an inthlauhna zau tawh tak tizimin, point 14-in a tla hniam a, mahse, point 63-in Lorenzo a la sang zawk tho.
Kum 23 mi Lorenzo hian hmuh theihin hma a sawn a. 2008 khan MotoGP-ah tel ve tanin, rider ropui Valentino Rossi nen an inkawp. Mahse, Spaniard mi thar hian Rossi a chung en duh bik lo va, Mallorca fa hrin; rilru paukhauh tak Lorenzo hian MotoGP barakhaihin, a tel ve phat atanga an intlansiak hmasa paliah pole (qualifying-a chak ber) a luah vek a, bike a khalh chakzia lantir mah se a la puitling lohziain a umzui thung. Intlansiak tak takah a tha zo lo va, Portugal-ah chiah pakhatna niin a che sual zui ta mawlh mawlh a, season a khar ropui lo.
Nikum kha inelna sang bera a tel kum hnihna a ni a, 2008-a a chet dan nen tlankawnga a bike khalh inpuitlin hleihzia a lang chiang em em. Mahse, a teammate Rossi erawh a la el zo lo deuh a, Italian hian nasa taka an inbeih hnuah Lorenzo hnehin a vawi sarihn nan MotoGP title a hlawh chhuak. 2010 a inher chhuak a, an tlan hnem tial tiala rinhlelh rual lovin Lorenzo a tha ber tih a lang chiang tulh tulh. He nau hian fim takin thluak a hmang tawh tih pawh a hriat a, pakhatna nih tum urh lutuk vanga bike thunun zo lova chet sual hlawk lohzia pawh 2008 khan a takin a dai nasa em em tawh a, a ching zui lo.
Tunhnaiah tlahniam deuh hret angin lang mah se, an tlan leh tur hmun parukah hian atan pakhatna nih kher a tul tawh lo va, pathumna a ni tluan thei a nih pawhin a vawi khat nan world champion a ni dawn a, tlankawnga chak ber nih ngawr ngawr aiin world title a pawimawh. Amah eltu Pedrosa chuan MotoGP title hmasa ber a thlir ve mek a, chet sual pawisa lova pakhatna a nih ngei ngei a tul a, bike a nei tha viau bawk si a, Lorenzo tan pawh season chawhma aiin chawhnuah a hnampuipa hi elpui a khirh tih a chiang reng.
Tuna inel zingah intlansiak bultanna tlan chhuah thiam bera chhal ngal Pedrosa hian Laguna Seca (USA)-ah khan Lorenzo hneh ngei ngei a tum a. Hma a hruai a, a tlan fal tan dawn tihin chhung ril lama 'pressure' lian lutuk a insiam avangin a che sual ta a, awlsam takin Lorenzo a chak phah a. Kuminah hian Pedrosa hian tum luat vang leh insawrbing tawk loh vanga chet sual a nei nual nghe nghe.
Tihsual khut ching thin Lorenzo erawh chu pawi thamin a la che sual miah lo va, hei hi hma a sawnzia leh a bike khalh a puitlinzia a tilangtu niin an sawi a. Chikmi thenkhat chuan tun dinhmunah Rossi ai pawhin Lorenzo an dah chungnung tan tawh a, Italian hian kuminah hliam vangin harsatna lian tak a tawk a, point tam tak a hloh phah a, a title pawh a hum zo dawn lo. Mahse, hliam a neih hma a dam ver vawr lai khan a bike ang chiah khalh Lorenzo umtu zawkah a tang hman tawh tlat a ni.
Kuminah hian Lorenzo leh Pedrosa lo mi dang tlankawnga chak thei pakhat an awm a, season bultanna Qatar-ah khan champion lai Rossi a chak ber a, a bak zawng Spaniard rider pahnih ta vek a ni. Tunlai khawvel infiamna hrang hranga ram langsar Spain-in MotoGP world champion thar a nei leh ngei dawn a. Spain-a an tlan tawhna pahnih : Jerez leh Catalunya-ah Lorenzo ve ve pakhatna niin, Pedrosa chuan Spanish fan-te hmaa dinhmun chungnung luah a, Aragon-ah tal chak ber nih ngei a tum lehzual.
Kuminah hmahruaitu pahnih ni ve lo mi dang tan hmun a awm tawh lovah a ngaih theih a. Lorenzo leh Pedrosa-te hian kum tharah pawh an bike vawn ngai bawk an khalh leh dawn a. Chutih laiin Yamaha atangin Ducati-ah Rossi a insawn dawn a, 2007-a hnehsawh taka Ducati bike hmanga world champion Casey Stoner chuan Honda a khalh leh dawn thung a. MotoGP rider inelna pawh nasa lehzual tura ngaih a ni.