A tawngkau chheh hi a dik em? tih pawh ka hriat loh? Ka hman hun hian Grammar ramrî a pel em? tih lam phei chu hla tak a ni ringawt. Mahni pianpui tawng a nih loh chu thuhran, Mizo tawng pawha, ‘a chhanna hrilh chawpin a biak theih sâwih sâwih e’ an tih tur chi, keini ang tan chuan, ‘a sang êm a, ka phak lo a ni’ tih mai loh chu sawi tur a vang khawp mai. A lo dik lo a nih paw’n, ‘Min dem lûl s’u, Lenrualte u’ kan ti leh mai a niang chu. Chuti ni si, eng vanga he tawngkam rawn pho chhuak ve ngawt nge maw ka nih lê? He tawng hriat lohina kan veng Football khawvel a tuam dan ka ngaihtuah let a, he tawngkam mawlte mai hian kan player-te leh veng mipuite chu 'Lungrualna Lammual Tlangah' min hipkhawmin, vawi duai lo Hnehna Hlado min chhamtir a nih si kha mâw?
Tu sawi chhuah nge? tih lam kan ngaihtuah lo. Greek tawnga dah tur phei chu nise, kan vengah hian thiam kan tam kher lo ang.A sawitu sawi chhan hriat tum pawh kan awm lem lo. A tul ber bawk hek lo.Kan veng chhung bika he tawngkam hmang hmasatu tana he thumal tlemteina a rilrua thu a sawi thuizia leh a rilrua hmun a luah thukzia phei chu sawi ila, mak in ti hlawm viau ang. Pu Darthuama te'n, "Tlaini tinin ka zawng thin che a, Tawnni reng i awm si lo, Aw, khaw nge maw i awm le"? tia an lo thlirkual velte nen pawh khan thluk khata dah a, a phek indawt chiaha rem tur a ni e, pawh lo ti la, i tisual thui lutuk lo turah ka ngai ve ngawt a.
Kan hruaitute hmalaknain Vodafone Cup 2012 khel turin ruahmanna alo awm a. Chutah lê, "Where are you now"? tiin veng chhunga Football player-te leh a tuimite a ko chhuak a. A tawi zawngin sawi ta mai ila, player-te'n theihtawp an chhuah rualin, he tawngkam hmang bawk hian, veng mipuite phungbawmah sawmin; mi inphalte thilpek leh veng mipuite tawiawmna zarah Pathian malsawmna dawngin tun dinhmuna kan veng tana chhinchhiahtlak hnumhma kan hnutchhiah ta reng mai.
He tawngkam tawiteina mite thinlunga thu a sawi nasat theihzia hi kan ngaihtuah ngai em? Hruaitu, player leh veng mipuite chu, "Where are you now"? tiin kan inzawng chhuak a, kan tangrual a,'chenna ngai loh ram kan fang tlang ta' a nih ber kha maw? He zawhna hi a chhangtu an awm apiangin mihringte nuna harsatna hi engemawzat chu sutkianin alo awm thin a ni. Mordekaia'n a fanu (a pami fanu), Lalnu Estheri hnenah, "Lal nihna ilo chan hi hetih hun atan ngei han a ni dawn lawm ni"? (a tawi zawngin ""Where are you now"?) tiin tanpui turin a sawm a, chu sawmna chu tihhlawhtlina alo awm chuan Juda hnam pumin an him phah ta a nih kha.
He zawhna ngai bawk hi Chanmari West hian a khua leh tuite hi min zâwt reng a. Min zawhna hun leh hmunte, min zawh dan kîte hi a inang lo mai chauh zawk a ni. Lumen zân te, Thlanlaihna hmunah te, Khawhar In leh Hnatlanna hmun atangtein âw nêm leh zaidam takin ""Where are you now"? tiin YMA member-te hi min ko asin. Heng hmunahte hian i hmel hmuh tum reng rengin YMA hian a mit a len ruai ruai thin asin. Khawi hmun atangin nge he kohna hi kan chhan dawn le? Mahni in chhung lum leh rizai hnuai atang ringawta chhan sen chi a ni lo. Hnathawh thawmhnaw nena, a thim avar thlu lova, he zawhna hi chhan a ngaih chang a awm fo ang.Aw Nula,aw tlangval, he khawtlang hmasawnna atana i theih tawk ti ve turin he zawhna hian a ko reng che asin. Mi dangte chhan tur chauhah dah bik suh. Sorkar leh Political Party-te hmalakna chauh i duhtawk chuan he veng hi i phatsan tlukah inngai rawh. He zawhna pawimawh tak hian i thinlunga awmzia a neih tawh loh chinah chuan mi pangngaiah miin an chhiar tawh miah lo vang che tih hi pawm thlap rawh. Chhuanlam tur i zawn chhung chuan i hmu êm êm ang. Mahse, i chhuanlam ang tho kha mi hian an tawng ve tih hria la, "I lênte kalsana he khawtlangin a mamawhna che hi i chhan a tul fo thin asin"
Vodafone Cup leh EURO-2012 te kan thlir zo ta. International player leh kan Branch YMA player-te chuan eizawnna thuhmun, Football an luhchilh tak tak dawn ta. Club Football ilo tuipui pha chiah lo a nih pawhin mite inpekna tal hi chu i hriat ve loh ka duh lo ve. Mizoram Premier League (MPL) khelh ve ngei tumin CWSC pawh a inziak lut ve ta rup mai.Club Football tha tak leh nung tak nei thei tur chuan veng mipuite kan tanrual a ngai dawn hle mai. Tun dinhmunah chuan mi inphal thenkhatte'n 'an robawmte hawngin' kan veng Football-in hma a sawn theihnan an insengso ta ringawt mai. Mi tlemte thahnemngaihna avang chauh chuan he CWSC hi a kal reng thei kher lo vang. Nakin lawkah, "Where are you now"? tiin kut dawh a tul hun ala awm ngei dawn, chutih hunah chuan, "Engzatah nge min rin ngam ve dawn le"? tiin zawhna min rawn zawt ang, ilo inngaihtuah theuh ang u.
Chhungkaw dinhmun chu a inang kher lo, thenkhatte Inrinni tuk bazar-na ringawt pawh hi keini ang tan chuan,'hun remchang chu awm se Pa ber hova Budget Session koh hialna tham' a tling mai thei. Mahse, hmeithaiin phal taka a neih chhun a pek khan Isua a tilawm a ni tih hriaiin, 'Kal chhuak thei lote pawhin mawhphurhna lian tak kan nei, Thilpeka rawngbawl turin' "Where are you now"? tiin he veng hian min ko asin. Engtin nge kohna chu kan chhan dawn le? "Tui mal far te te"in Ram Nuam a siam theih chuan, kan tlin tawk theuhva kan tan tlan chuan he khawtlang hi a mualpho ngai lo vang tih hi i ring tlat ang u.
A tawpnan, he zawhna mawlte "Where are you now"? hian a chhiartu zawng zawngte thinlungah thu sawi mawlh rawh se tih hi a ziaktu duhthusam chu a ni e