Ka hriatna thazamte'n min kiansan hma zawng leh ka thawk feih feih chhung chuan 'khami kum' Krismas ka hman dan kha ka theihnghilh thei kher lo vang.'Krismas Nang nen' tiin, ka dam chhunga 'Krismas dik tak' ka hman hmasak ber chu ka hmangaih ber leh min hmangaih ber rengtu bulah ka hmang a nih kha maw! Ani nena kan intawn dan chu ka sawi thui lo mai ang. Ka la hriatreng chu 'Sahmulphah Thla', Pathian Ni hnunhnung bera intawng kan ni tih kha a ni.
A tawi zawngin ka sawi mai ang e. Pawltlak Thla a lo thleng a, mitin mai chuan Krismas lam hawi rilru kan pu theuh va, mahni tawka a nuam thei ang bera hmang turin kan inbuatsaih suau suau va. Urlawk Ni a lo thleng a, kum dang ang chu nise ei leh in, silh leh fen, therhlo fahran nen khan neih thinglung khawngin...chu mai pawh a ni lo, puk chawpin ka inchhek ar bawm ve leh ngei awm si a. Mahse khami kum zet kha chuan ka hmangaih ber mai khan "I hmangaihna ka tan a tawk" an ti tlat mai pek a, ho lam taka sum leh pai khawhral zawnga hmang lo turin min rawn ta a nih chu. Engkhaw sawi set set lova han "Halellui" pawp mai kha ka va han chak tak em!
Chumai ala ni lo, sum leh pai lama ka harsatzia min hriatthiampui takin "Halpuah leh halmawite hi hal ve lo vang aw, a lo thlawna sum khawhralna a nia, sorkar leh khawtlang duh loh zawng a ni bawk sia" ala ti leh zel nen. Aw! ani nen hian kan intawng lo vang tih ka va han hlau tak em! Kan tan Krismas Tree a ngai ve lo, thingkung zawng zawng kha Krismas Tree tlukin a mawi a, Krismas thilpek dang engmah a phut lo.Ka thinlung ka hlan khan a lawm tawk em em mai kha a nia. Ka theih ang tawka ka lo khawl ve, sum leh pai hmanga mi harsa zawkte tanpui tura Urlawk Ni tlai lama veng mawng lam pana kan kal dunte kha hriatreng ava han nuam tak em!
Urlawk Zan a lo thleng, nu leh pa tam tak tan 'Zan Lungngaihthlak'a ni leh ngei ang. Mahse kei erawh chuan Hmangaih ber nen 'Zan Thianghlim' tak mai chu a mawi leh a thianghlim chinah hmangaihna par tlanin ka hun ka hmang kha a nia. Ka hmangaih ber nen hian intawng ta lo ila chuan eng ruai va ang bik suh. YMA Duty leh Khawtlang Hruaitute relhruksan tum reng reng khan harhfim mang loin a thim lai ka chuh leh emaw kha a ni awm si a. Ani nen chuan ngampa takin a englaiah pawh YMA Duty Bukte chu kan kal pel ngam zan si a. Thil tisual lotu tan chuan hlauhawm mawlh hek lo.
Khami kum Krismas tuk ni chhuak han mawi danglam bikziate kha aw... Kum dang zawnga Krismas tuka chhungte ruala chawhlui kil ve ngai lo khan hlim taka Krismas Chibai inbuktawn chungin tukthuan kan chhungkuaa kan kil ho kha a ni a, a ropui hlawt asin. Ka hmangaih ber ka tawn tak avanga ka nun inthlak danglamin a hrin chhuah vek kha a ni si a. Nu leh pa tam takin an fate awmna chin pawh an la hriat mang loh lai khan kei chu ka hmangaih ber nen Biak In lam kan pan leh thei tlat mai. Ka lung hi ava han awi chiang tak em. Aw! Ka hmangaih, heng zawng zawngte hi nangmah vanga tawng chauh ka ni si a, ka tan hian i va han hlu tak em! Nang nena Krismas kan hman dun theih dawn loh ai chuan hman loh pawh ka thlang zawk awm e. I tel lo chuan Krismas hian awmzia a nei mawlh lo. Nang nen chuan Krismas Ruai te kha ava han tui danglam bik tak em!
Eng vanga Ani nena Krismas hman dun kha nuam ti bik em em nge maw ka nih le? Thalai tam zawkin an duh berte bulah an hmang ve tho awm si a. Eng dang vangmah a ni lo; Krismas hi ka hmangaih ber leh min hmangaih em emtu Lal Isua piancham a ni tlat alawm. Hmangaih berte piancham lawmnaah tu nge hlim lo thei ang?
Ka thalaipui zawng zawngte u, ISUA nena Krismas dik tak hmang turin ka sawm a che u. "Isu, vawiinah hian kan thinlung bawng inah, lo piangthar leh la nang kan chatuan Lal turin" tia Isua nena Krismas hmang theuh turin YMA AW chhiartu zawng zawngte duhsakna nen Krismas Chibai vek ule.