Chutih mek laiin YMA hmalakna chu a kal ngaiin a kal reng a, Ram leh Hnam Humhalh turin theih tawp a chhuah mek zel bawk. Hetiang hun hi YMA member-te leh hruaitute fimkhur hunlai tak a ni tih kan hriat theuh a tha awm e.
Party hrang hrangin thil hrang hrang tawktarhin an rawn inzuar dawn a, ngaihtuahna fim kan hman a ngai khawp mai. YMA chu party awn lam nei lova, Zoram thatna leh hmasawnna atana thawk tur kan ni tih hriain; sum leh pai leh therhlo te te hmang hian YMA hmingtha sa hi i tihmingchhe lo hram ang u.
Kumin chhungin kan vengin chhiat kan tawk hnem leh tawh hle mai. A bik takin thalai, kum naupang zawk kan boral zing khawp mai. Thalaite kan inngaihtuah harh a hun ta. Damdawi leh ruihhlo chi hrang hrangin kan ram a tuam mek. Ngaihtuahna fim tak nena ruihhlo bawiha tang lo tura kan rilru kan siam a tul khawp mai.
Chhiat tawhte hi YMA member-te hian tanlak lehzual nan hmang ila, tlawmngaih kan chhuahna kawngah harh thar nan hmangin, theih tawp i chhuah tlang zel ang u, chu chu midangte tan malsawmna a lo ni ang.