Laipuitlang chhiatna lo thleng hian kawng khat talin sorkar leh mipuite thinlungah hmasawnna rahbi min tuksak thei hram se chuan a lawmawm deuh tur, inngaihtuah harh kan hun tawh a ni e.
Sorkar hmalakna lam chu helai veng chhung chanchinbua han sawi phak rual a ni lo. Mahse hetiang tluk zet hian kan in leh lo kan din dan leh kan enkawl dan te, kan tuichhe paihna leh tuiluankawr kan enkawl dante hian chhiatna nasa tak a thlen thei tho tih hriain mitinte i fimkhur ang u.
Kan veng ngat phei chu khampanga khawsa kan ni tak meuh va, tuihawk kalsual mai mai pawh hian harsatna min thlen thei tih hriain kan theih chen chena kan lo inven thiam hi a pawimawh leh zual tak zet a ni.
Tunlaiin kan veng chhung hmasawnna tura hnathawh a awm nual a, a lawmawm viau. Chutih rual erawh chuan hnathawh tha lo a awm erawh chu a pawi takzet a ni. Veng hmangaihna thinlung pu chunga, kumkhaw rotling ngei tura thawh ni hlawm se a va lawmawm dawn em!
Heng zawng zawng khaikhawmna chu Ram leh Hnam Humhalh bawk hi a ni leh thin. Kan Ram, kan Veng, Mizo Hnam tan aw.