YMA nihphung leh a tum pawh hrechiang lo pawn YMA chu kan zahin kan ngaisang tlang vek mai. He pawl ropuia member pakhat nih ve ringawt pawh hi inchhuanna tham a tling awm e. He pawl tiropuitu leh timawitu hi eng ber hi nge ni ta ang le?
Pawl hruaitute vang hi a ni thei mai ang em? Tling lo leh tlin lo inti chung chunga theih tawp chhuah chung sia he pawl enkawltute leh kaihruaitute hi fak phu tak chu an ni. Mahse pawl innghahna chu a hruaitute chu a ni vek thei kher lo vang.
He Pawl ropui tak mai hi Kristian Sakhuaa innghat tlat a nihna hi a ropui a, a nghehna tak leh a zahawmna pawh a ni awm e. Pathian duhdana kaihhruai leh hma la thin he pawl hi a rintlak a, a tlo a, a ziktluak zel rih chu a nih hi.
YMA din champha a lo thlen hian member-te hian he pawl thiltumte ngaihtuah chungin rilru thar pu theuh ila, Ram leh Hnam tana kan inpeknate lo sang zual zel se, kan thlen chin atang theuh va hmasawn thei turin ke pen i tum tlang teh ang u.
Chanmari West khawtlang mipuite YMA AW Editorial Board chuan YMA Day CHIBAI a buk vek a che u.