Veng chhung hmasawnna tur leh veng hmingthatna atana hmalakna tur kawng hrang hrangah kan rahbi a pelh zeuh zeuh niin a lang. Mipui nawlpui chuan a chipchiara sawi tur kan hriat chiah loh pawhin a ngaihven zual chu an lungawi lo ta fo mai.
Thil dangah peng leh daih te’ng. Thisen Pek Runpui, Mi harsa In sak tihte chu tunlai kan veng mipuite titi tui ber a ni hrih a, a ropui hle mai. Tunlai khawvelah tlawmngaih chhuah na tur leh tih theih a tlem tawh viau laia heti anga Branch YMA-in tlawmngaih chhuahna tur hun tha a duang a, mi dang tana malsawmna ni theihna kawng a dap chhuak hi a ropui hle mai.
Thiamna bik nei lem lo tan chuan tlawmngaih viau pawh hi a theih tawh lo tih chu Laipuitlang chhiatna thleng atang khan a chiang hle awm e. Chuvangin, kan tih theih chhunah hian theihtawp i chhuah tlang zel ang u.
Thil hote a ngaih theih, harsa ni miah si lo, Branch YMA programme-ah te hian tlawmngaih chhuaha kal a ngai tawh niin a lang. Tunhma kha chuan YMA Day-te hi member-te chuan kan nghakhlel hle thin a, tunah chuan a kal tur kan inhmu zo lo vang tih kan hlau rum rum tawh a ni si.
T-a lo awm hi chu kei hian ka va han vanneihpui tak em! Chutih rual chuan veng mipuite tih finin kan awm leh dawn a nih hi. A lawmawm thin e.