Mite tanpui leh thil tha tih hi duh viau mah ila, mimal thahnemngaihna ringawt hi chuan tih mai hi a lo harsa khawp mai. Chuvangin, hetia pawl anga hmalakna a lo awm hi mi tam tak tan chuan mite tanpuina kawnga pen chhuahna remchang tak a ni.
Thisen pek kawngah hian kan veng chuan hming kan lo chher tawh khawp mai a, tin, kan veng mi thenkhat chuan damdawi in lamah pawh kan lo hmang tangkai tawh hial a ni. Chuvangin, tun tumah pawh hian thisen pe ve thei ngei turin member-te’n kan rilru kan siam a tul khawp mai.
Veng chhungah chhung-kaw hrang hrang, khawsak dan dinhmun in ang lo tak tak kan awm. Chutih rual chuan lungrual taka mi harsa zawk in sak sak tura lungrual taka ke kan pen tlang hi a ropui hle mai. Mi dang tana malsawmna nih hi Pathian duh dan pawh a ni reng si a.
Laipuitlang leh Ramhlun Venglai leimin tuar tanpuina bawm dawh a ni a, sum leh pai thahnem tak hmanga mi dang kan tanpui thei hi a ropui hle mai. Tam tak pe thei lo paw’n mahni remchan ang ang kan pek khawm hmangin veng hming a mawi a, mi dangte tan a lo tangkai leh em em zel a lo ni.
Tui mal far te te hmang hian kan veng hi veng nuama siam turin tan i la tlang zel ang u.