Hetiang huna chanvo inpek chungchangah hian a ruattute’n ngaihtuahna thui tak sen a ngai fo. Tu emaw, a fel leh that em avanga chanvo pek chiam mai hi a fuh ber lo. Chanvo kan pek kha mihring ve tho, hman loh chang leh damsam loh chang nei ve thin a nia, a telna pawl hrang hranga hma a lak theih loh changin rilru nuam lo zetin a hun a hmang fo thin tih erawh hriatpui a tha khawp mai.
Chutih rual chuan pawl hrang hranga inhmang nasa ber berte hi mi hmantlak chu an ni lawi si. Chuvangin pawl hrang hrangte hian mawhphurhna la turin kan it fo reng a, a dikna chen pawh a awm ang.
Chuvangin, chanvo kan inpek hian ngaihtuahna fim tak nen, thui tak thlir thiam a tha khawp mai. Kum lama naupang zawk leh nakin lawka la hman tlak em em thei tur kan inchher chhuah thiam hian pawl tan a hlawk thlak fo. Tun hun chauh thlir lo hian nakin lama pawl kal zel dan tur ngaihtuah ran chunga hruaitu inruat hi a fuh khawp mai.
Mi tlin lohna lai leh that tawk lohna lai chauh thlir a kan hnualsuat chuan tumah kan teh tling ngai lo vang, mi thatna zawn hmuh fuh thiam a, chhawr tangkai thiam hi hruaitu tha tihtur zawk chu a ni.