Kum kal ta lamahte a enkawltu tha tak leh mi inpe tak tak avangin kan chanchinbu chuan hma a sawn hle mai a. Chutih rual chuan hmasawnna hian tawp chin a nei lo ang bawkin kuminah pawh a hma aia changtlung zawka chhuahtir zel tum a ni.
Chanchinbu that leh that loh kawngaha endiktu hmasa berte chu a chhiartu veng mipuite hi kan ni tih i inhre thar leh theuh ang u. Kan veng mawina hi kan kutah a awm tih hriain tan i la tlang ang u.
Veng chhung chanchinbu a nih ang ngeiin a tam thei ang ber veng chhung chanchin tihchhuah tum a ni a, pawl hrang hrang hruaitute report pek uar deuh deuh turin kan insawm e.
Kum kan han hmang chho zel ang a, thu chhuah tur haihchham fe fe chang a awm leh ngei ang. Chutih hunah chuan thu leh hla lama tui mi te, ziak mite kan ngai leh dawn hle mai che u. Tu mah inthlahhrung hauh lova thu rawn ziak thin turin kan insawm bawk e.
Article hmasa ber rawn ziaktu Pu Zara chungah lawmthu kan sawi a, chutiang bawkin veng mipuite min tawiawmna turah lawmthu kan sawi bawk e.