VL Thakima Pautu
‘Apollo-11 landed on the moon with the surprise to everyone on July 20,1969. This was the first manned mission. There are still skeptics today that believe this was a hoax’. He thu hi Apollo-11 chanchin kan chhiar chuan kan hmu theuh awm e.
Tun tumah hian kum 1969-a mihring thlaa lawn kha tak tak a ni em? Rinhlelhawm a nihna leh intihderna a ni em? Tih lam hi kan thlir dawn lova, Apollo-11 a NASA mission tum ber chu thla a mihring ngei lawn a ni a, an tumna te tihlawhtlingin American Neil Armstrong leh Buzz Aldrin-ate chu July 20,1969 dar 20:18 khan an lawn/tum ta a ni. He thil thleng hi tun thleng hian khawvel mihring mak tih a hlawh a, a mak reng em tih hi kan thlir tur chu a ni.
Tun hma chuan Computer hardware hi khawl lianpui a siam a ni a, a khawl bunna ringawt pawh in lian tak an hmang hial a ni. Mihring thiamna alo sang a, dawhkan te tak tea hun mai theih chu sawi loh; lennaa ken mai theih Laptop an han siam leh a, fel si, kim si, te siin an in siamsiak hi a ni ta mai a nih hi! Mobile handset te phei chu hum pil tham lek alo chhuak ta, keini ve zawng mi siamsa, kan mobile handset pawh a tangkaina tur anga kan hman thiam loh laiin a tawi zawngin han sawi ta ila; mihring siam an lo tum leh der tawh mai a, a mak tih loh rual a ni awm love. Mahse hengte hian min siamtu finzia leh ropuizia a tilang zual zel alo ni.
Bible-ah chuan Isua alo kal leh dawn tih a inziak a. A lo kal leh dawn a, khawvel awmdan tur pawh a sawi thlap a, heng thute hi khawvel mifingho hian an lo hre ve nge? Engtikah emaw chuan khawvel hi a chhe dawn tih hi an ring ve tlat mai. Hei vang hian mithiamte chuan chumi hun a inven dan tur leh himna tur ngaihtuahin an hmanhlel a ni ber mai. Hetiang lam hawia Film siam pawh kan en tawh hlawm awm e. Arsi themin khawvel a den tur lo bawm darhte, van thengrenga Boruaklawng, mi engemawzat leng siamte, thlaa mihring lawn te bakah Sikeisen an la ti ta deuh deuh. Heng bakah hian khawvel piah lamah mihring an awm em tih zawhna hian he lei a chhiat huna mihringte chenna tur zawnna lam a kawk lo thei lo a ni.
Isua Krista pian hma kum 400 B.C vel daih tawhah khan ‘Mu angin, sang takah i bu chhep mah la, chumi atang chuan ka la thla tho vang che, tih hi Lalpa thu chhuak a ni’ (Jeremia 49:16) alo in ziak daih tawh a. Pathian hian Van thengrengah emaw, thlaah emaw, sikeisenah emaw, tuifinriat mawngah emaw A mi siam mihringte hian chenna tur an la zawng dawn tih alo hre lawk daih tawh.
Thla a lawn kum 43-na, July ni 20, 2012 alo thlen hian thlaah meuh mihringte an lawn ta hian Pathian ropuizia a tilang thin a. Pathian hian khawvel chhiatna lak ata hi tumah him tur reng an awm lo tih min lo hrilh tawh a, kan Lalpa ngeiin ‘Vanah lawn mahsela chuta ta chu ka hnuk thla ang’ (Amosa 9:2)-alo ti daih tawh a ni. Hengte hian engkim chunga thuneitu chu Pathian a ni tih a tilang chiangin mihring finna piah lama roreltu leh thuneitu chu Pathian a ni tih a tilang chiang hle a ni. Hla siamtuin “Van sang leh Seol-lamahte, Pathian ramri khamna reng a awm lo” alo tih hi hriaiin, khawi hmunah pawh awm ila, Pathian hmuh loh reng a awm si lo.
An fel tawh teh reng nen Tv. Hmingthana ‘V’ leh Tv. Mawia ‘CH’ ten ‘weekend hi chu awm lo se kan fel ngawt ang’ an tih hun a lo thleng a, 4:30 AM:- Chda mobile chu a chik tat tat a, branch Secretary zualko sms a nih palh ringin peih lo chung chungin a han en hram a, chutah Tv. Mangheta pawhin Zofa thu thar a nih hlauh takin tiin a han hawng bawk a.
Zing dar 10 a tho tan chuan a hma mah mah; mahse, a hawn loh chuan sports news a lo niha a hriat loh chuan a pawi dawn si tiin Tv. Ti-a chuan a han en ve bawk a, vengchhung mi pawimawh? zawng zawng deuh thaw chu he hunah hian an harh rual deuh thup a, an han en chian chuan, “ Janin ymao chut zan o, buk lam i pan khwm ag’.
He thu leh hun hi pawimawh tak a ni, YMA AW min ti chak a, min ti phur a, big Boss hi a dang la neih belh leh phei ila chuan aw....
Thlanmual Sub-Committee
@ Hun remchang hmasa berah Kuang duan hnatlang neih tum a ni a, memberte hun lo insiam lawk turin an inngen a ni.
@ An member Pu K Lalrinmuana Champhaia, a nu damlohna avanga zin mek pawh tluang taka a rawn haw ngei an beisei a. A nu pawh a that chhuah leh thuai an duhsak hle.
@ Thlanlaihna lamah tlangvalte tlawmngaih chhuah a, a tam thei ang ber thawk chhuak turin an inngen.
@ An Vice Chairman Pu PC Lalawmawia’n Bawngkawnah wholesale dawr a nei chu an lawmpui a, Kuang duang a hnatlangte Ui sa leisak a tum avangin Sub-Committee member-te an lawm hle bawk.
@ An member Pu C Zohmingliana pawh in sakna lamah a buai thei hle a, In a sak zawh vat theihna atan duhsakna an hlan a, In thar lawm turin an inring tawh hle bawk.
Olympics-a medal lak a hlawk
T-a
Infiamna kan ti rau rau a nih chuan heti zawng hian ngaihtuahna seng chhin ta ila; kan fate zingah an naupan laia infiamna lama talent nei an awm a nih chuan Olympic Games-a medal laktir tum khawpin kaihruai ta ila, a hlawhtling a nih ngat chuan a hlawk khawp ang.
Delhi-a chhungkaw harsa taka atanga chawr chhuak Sushil Kumar chuan mite fak hlawk khawpin a bei ngawrh a, tlangval tlawm leh rethei ve tak ni mah se a talent tipung zelin, 2008 Beijing Games-ah khan wrestling kg 66 freestyle-ah gold medal a chai chhuak.
A hmain infiammi beiseiawm tak a nih avangin Railway Ministry chuan Sushil hi la lutin thla tin a intunnunna khawp hlawh an pe. Beijing-a medal a lak rual hian Delhi naupang rethei ve tak ni thin khan thawk leh khatah Rs vaibelchhe 1.75 a dawng a, Railway chuan chief ticketing inspector-ah a kaisantir bawk. Hei mai bakah Indian infiammite chawimawina sang ber Rajiv Gandhi Khel Ratna award hlan a ni.
Sushil hian tunlaia Mizo naupang tam takte neih ang nei pha lo mah se, a neih hlu tak talent tipung tura a beihna nasa tak avangin a damchhung ei a chai chhuak mai ni lovin, mi hausa kan tih huangah a inhlangkai. Inthlahdah mai lovin 2010 khan World Championship-ah gold medal a la zui a, Indian wrestler zinga he dinhmun luah hmasa ber niin Rs nuai 35 a hmuh belh bakah Railway-in Assistant Commercial Manager-ah a kaisantir bawk.
Olympic Games-a tel phak ringawt pawh Indian tan chuan hnemhnampui tham a ni a, Mizo tlangval thalkap thiam C Lalremsanga pawhin hamthatna tam tak a neih phah bakah, Sports Department-ah officer hna pek niin a damchhunga nuam taka a chhungte nena khawsak theihna tur a hmu.
Khawvel awmchhungin Olympic Games hi a awm reng ang; mihring pawh kan awm zel dawn a, fa kan nei zel ang a, tunah pawh eizawnna harsa avangin mi tam tak kan buai a, kan fate zir nan kan neih zawng zawng sen kan hreh loh laiin kan beisei ang erawh thlen a har tial tial.
Mizo zingah tu mah Olympics medal la thei an la awm lo va, kan fate zingah talent nei tha kan nei a nih chuan Olympics thlir chunga an tet lai atanga kaihruai theih a tha hle a, kan cho phak loh a ni bik lo. Sum tam tak an hui tur piah lamah khawvel hmaa India leh Mizoram chawimawi tur an ni a, eng kawng pawh ni se ram chawimawitu aia chhuanawm hi khawvel thlirnaah a awm thei lo. Khawvel hmaa hnam puanzar pawt phar a, khaisana awmtir thei tlem te zinga mi chu infiammite an ni a, chutih laiin mi zawng zawng erawh hemi kawng zawh tura tih chi an ni lo.
Kan tum ber chu fa puiting leh hlawhtling chher chhuah a ni a, lehkha zirnaa hlawhtling tak tak Mizo zingah tam tak an awm tawh, mahse, hnam dang ngaihsan theih leh ram pumin a chawimawi an vang a, an theihna avanga ram pum hriat hlawh phei chu sawi tur an tam lo chiang hle.
Khawvel hian infiammite chanchin hi nitin a um zui a, India ramah hian politician, infiammi leh filmstar-te aia chanchin thar luah nasa leh lar an awm lo va, heng zinga chawimawina dawng nasa ber chu infiammite an nih a rinawm.
Tunlai khawvelah phei chuan infiamna leh sumdawnna hi thil inzawm tlat a ni tawh. Mipui hip infiammi chuan khelmuala a dinhmun aia nasain sum a hmu thei a, infiammi lar tak leh sum hlawm hui hnem takte dinhmun hi kan luah ve phak ngai loh tur a ni bik lo vang.
General Santos City-a mi rethei veng tia an sawi atanga seilian Manny Pacquiao chuan tun kum khat (July 2011 - June 2012) chhungin India pawisa cheng vaibelchhe 340 vel a hnek chhuak thei. A naupan laia a dinhmun hi tuna kan veng naupang tam tak aia chhe zawk a ni chiang a, tunlaia Mizorama cheng ni ta se hlawhtling tura a kalkawng a hnai zawk mai thei. A chhan chu a seilenna ram Philippines lah khawvela eiruk tamna leh sum duh avanga inruk bo tamna ber pawl a ni.
Badminton Club
Tunkar Ni 24-30 July 2012 chhunga Electric Veng YMA Hall-a badminton Competition neih turah Chanmari West badminton Club atangin Single-ah 1 leh Double pair 8 chhuah tum a ni.
Zofa
@ Ni 23.7.2012 (Thawhtanni) hian an member mi 10 te chuan Workshop on Song & Drama (North East) nei turin Guwuahati an pan a, tum ang chuan ni 26.7.2012 ah an lo let leh ang.
@ Ni 24.7.2012 (Thawhleh) zan dar 7:30 ah YMA Zawlbukah lam zir leh tur a ni a, hruaitute kim taka kal turin an inhriattir.