- Mangheta
Khawvelin hma a sawn zel lai leh thiamna a san tual tual lai hian Mizo hnamte hian kan hnamzia leh nunphungte kan mausam tan zel niin a lang. A bik takin kan veng pawh hian Mizo Hnam Lâma kan hmingthatna chu kan hloh tan tial tial ta mai.
Kan Mizo nunphung leh tih dan tam zawkte kha chu tunlai khawvel nunphung nen chuan a inmil tawh kher lo vang. Mahse kan Hnam Lâmte hi chu kan humhalh that reng loh chuan, hei lo hi Hnam Lâm dang kan nei dawn si lo. Tu mahin min rawn humhalhsak dawn lo tih hriain keimahni Mizote ngei mawhphurhna liau liau a ni e.
Kum engemaw chen kha chu Mizoramah hian Hnam Lâm thiam veng kan lo ni thin a, mahse tun hnaia intihsiakna awmah chuan he kan hmingthatna hi kan hloh tan tlat mai. Tu mawh nge ni ta ang le? A nihna takah chuan Mizo Hnam Lâm tluka Mizoram pum hriata kan veng hming timawitu hi a awm kher dawn em ni? Infiamna lamahte kan han bei ngial thin a, mahse engruai chu kan ang si lo a nih hi. Chutihlaiin kan veng hming timawi thintu Hnam Lâm lah chu a veng pum deuh thaw mai hian kan ngaihthah sawt viau bawk si. Mahni hnam ziarang hmusittu chu mi pangngai an ni ngai lo tih hriain, kan Hnam Lâm leh zaite hi ngaihsan nachang i hre thar leh ang u. Mizo thalai ka nih chuan kan hnam lâm leh zaite hi ka thiam ve tur a ni tih hi i pawm tlang ang u.
Mahni hnam ziarang changkan san hi Hnam boralna a ni. Hnam nun leh ziarang boral hlauh vangin Central YMA-in Ram leh Hnam Humhalh Kum a puang a. Kan kumpuan ang ngei hian hemi kawngah hian YMA member-te’n kan tih ve theih awlsam tak chu kan Hnam Lâm leh zaite chawisana humhalh nachang kan hriat hi a ni awm e. Kan Hnam Lâm leh zaite tha taka kan humhalh chhung chuan Chimral pawh hi a hlauhawm ngai lo vang.
CHAPO HMAI KHAWR
- J. Nanga
John Milton chuan, “That derna hi hmuh theih loh sual nung reng chu a ni” a ti, a dik fu lo maw. Tum khat khawhar ina ka kal chu an hausa bawk a, an in a nuamin kal an tam hle. Ka’n hawi kual a, bang zawng zawngah chuan mitthi leh a chhungte pual tur niawm tak pangpar lem hlir mai hi an tar khat tlat a, ropui ti tan chuan ropui tak tur a ni. Chung an pangpar lem tar chu zahnih zathum man aia hniam lo tur vek mai hi a ni a, sawmli chuang chu ka’n chhiar nghal mai thei lehnghal a, hmuh mai phak baka eng emaw zat la awmte nen phei chuan sing chuang man zet chu a ni ngei ang.
Nunna nei lo, chung pangpar lem ka’n thlir chuan a lem mai a ni bawk a, ho ka tiin, a mawina leh hlutna ka hmu phak lova, politicianten vote zawn nana an tihawm tawk lekin ka hmu. A awlsamin dawr ami lei mai theih kan ti maw, kan ngai pawimawh tak tak a nih chuan dawr kal buai ngai lovin a man hu a inpek theih a, mitthi chhungte tan a tangkai zawk ngei ang; mahse, sumdawngte kan duhsak ve hrim hrim a nih chuan thudang nise. A dawngtu tan han tar chuai mai hi a ropuiin laina an ngah zia lanna pawh a ni ngei ang; mahse, hemi phenah hian awm a awm tlat lo maw!
A petu tan hming ziah lan a remchang a, kan ziak lang thin. Hei hian a entir ni ta bera lang chu kan intawrhpuina phena kan chapo ruk zia mai a ni. Kan duh ber chu mitthi chhungte hnem a ni lawm ni, pangpar lemin a hnem tak avanga hlim ta viau kan hria em le. Lemchanna khawvela lemchanna hmanraw pakhat ve mai a lo ni zawk a ni.
Ngaihtuahna leh lawmna hre tawh bawk si lo, mihring tling tawh lo (mitthi) tan pangpar lem chu an chantawkah kan ngai nge, hla phuahtu’n ‘Pangpar angin ka chetzia lan tir ang che’ a tih angin, pangpar lem a nih angin a lema intawrhpuina tawk lekah kan ngai zawk.
A dik leh dik lo chungchangah chuan mitin hi a buklung khaitu leh endiktu kan nih leh tho thin avangin sawi chiam hian awmzia a nei lo fo thin a; chutihlaiin, thihna chung-changah hi chu kan Mizo viau avangin sawi a nuam thin. Kan hnam chin thin dan pawh ni hlei lo, pangpar lem pek hi a chin zel tlak em?ZOFA NEWS
@ Ni 5.7.2012 (Ningani) khan Reiek ah programme pawimawh tak an nei a, member thawkchhuakte chungah lawmthu an sawi.
@Club member te tan T-Shirt mawi tak siam a ni a, member ten a man pangngai chanve chauhva lei tur a ni a, member zawng zawngte lei thei vek turin an ngen.
@ Ni 10.7.2012 (Thawhleh) zan dar 7:30 ah YMA Zawlbukah lam zir leh tur a ni a, hruaitute kim taka kal turin an inhriattir.
@ Programme pawimawh tak tak an hmabak avangin Member-te tun aia Lam zir ngai pawimawh leh zual turin an inchah.