Chanmari West Branch YMA chhang member zawng zawngte Ni 5.5.2012(Inrinni)-ah hian Primary School kawtah zing Dar 10:00-ah LPS Naupang pualte nen hun hmanho tur a ni a, YMA chhang member zawng zawngte kal theuh tur a ni e, hun hlimawm tak hmanho tum a ni.
NGENNA
Central YMA Football leh Basketball Tournament kan hmachhawn turah kan Branch YMA member zawng zawngte chuan Rs 10.00 aia tlem lo theuh thawh tur a ni a, hei hi Section YMA ten an khawn dawn a, thahnemngai taka pe theuh turin Branch YMA chuan member zawng zawngte a ngen a ni.
CHHUANAWM
Reuben Lalhmingmawia s/o Roluahpuia, Vanapa Section ami chuan Dt 20-22 April 2012-a Delhi-a All India Seikokai Karate Championship neih zawh takah Mizoram tan Bronze Medal a rawn hawn a. Tin, thla leha Mizoram aiawha All India Karate Federation-a tel tura thlan nghal a ni.
Thlanmual Sub-Committee
@ Ni 28.4.2012 (Inrinni) nileng hnatlang thlanmual tharah neih a ni a, member thawkchhuak an tha hle a, tlai lamah chawhlui kil ho nghal a ni.
@ Hun remchang hmasa berah Kuang duan hnatlang neih tum a ni.
@ Thlanmual a lo thianghlim zawk theihna atan mahni chhungte thlan theuh tifai turin ngen kan ni e.
Tui luan kawr
Tlang ram chhengchhia a cheng nih vang ni maw, ngaihsam hrim hrim vang zawk ni maw, tui luan kawr kan ngaihthah a, tui chhe paih dan a mumal lova, hei hian lei min a tih tam phah ngei ni chuan a lang.
Mohenjodaro-ah te kha chuan drainage system khan an lo ngai pawimawhin tha takin an lo duang thlip thlep tawh a, chu chu Lal Isua pian hma kum tam tak tawhah khan a ni.
Kan ramah chuan kan in bul velah tui chhe paihna tha nei kan tam lova, kawngpui sira tui luan kawr awmchhun lah chu PHE Department-in an pipe kal nan an hmang a, bawlhhlawh a ti tang a, buaithlak tak a ni, an pipe hi phum ta vek se, chhungkaw tin hian kan tui chhia te mumal takin paihna nei bawk ila kan fel duak mai awm e.
Lawmthu
Pu PC Thangkhuma (L), K. Sectionte in bul tui pipe T- cluster mumal lo taka awm thin kha, bialtu Councillor Pi Zamanthangi leh Local Councilte hmalaknain siam that a ni a, hemi chungchangah hian PWD, PHE hotute leh thawktute chungah leh mipui lirtheia kal vel an tihbuai zawng zawng chungah harsatna thlentute’n lawmthu an sawi a ni.
CVTTP NEWS
@ Ni 4.5.2012 (Zirtawp) zan hian meeting koh tum a ni a, bial neitu zawng zawngte khan mahni bial theuh te lo inpeih fel hman turin an inchah.
Jerez-ah tu nge tlan chak ber ang ?
(Thuchhuah tur lam kan tlachham deuh a, mahni vei zawng zawng ziak ila, theh lut zel ang u. Ho lua emaw te lua emaw pawh a awm chuang lo va, kan veng chhung thil kher lo pawh a leng. Amaherawhchu, kan thu thawn erawh chhuah ngei ngei tur tihna a ni kher lo tih hriatthiam a tha. A hnuaia mi pawh hi a kar awl hnawh khahna chi khat a ni deuh ber : T-a)
2010 world champion Jorge Lorenzo chuan Jerez tlankawngah kum thum a zawna pakhatna nih tumin vawi tlai hian intlansiak a hmachhawn dawn a, world champion Casey Stoner chuan harsatna a neih siam thaa kumina a vawi khat nan hnehna chan theih a inbeisei bawk.
2012 MotoGP championship-ah hian 1000cc hman a ni a, Qatar-ah tlan tawhin intlansiak tawp dawnah Yamaha khalhtu Lorenzo chuan Repsol Honda rider pahnih Stoner leh Dani Pedrosa lehpel ve vein pakhatna a ni a, Mallorcan rider hian a beisei phak loh hnehna a chang niin a sawi.
Losail tlankawnga season an tannaah a hmasa ber atangin Stoner a tlan chhuak a, hun rei tak hmahruaiin pakhatna ni thei turin a fal hman. Mahse, lap nga vel a la awm tihin 'arm pump' vangin harsatna a tawk a, Lorenzo bakah a teammate Pedrosa-ten lehpelin pathumna a ni hram.
Kumina a vawi hnih nan Spanish tlankawng hriat hlawh tak Jerez-ah an tlan leh dawn a, season tan hmaa champion tura rin kai Stoner chuan Qatar-a a buaina ang kha a neih zui a rin loh thu a sawi a, tuna an intlansiakna tur hi a chet that thinna hmun ni lo mah se, season inpuahchahna an neih laia an tlanna hmun niin a khalh chak ber a ni.
A chet thatna hmun ni lo mah se season tan hmaa hnuhma tha a neih tawh avangin Australian chuan tun pathianniah a chet that ngei a beisei. A teammate Dani Pedrosa chuan 2006-a MotoGP a luhchilh atangin a vawi khat nan world champion nih a tum ve mek bawk a, Stoner aiin Qatar-ah a che tha bawk a, a hnampui Spanish mipui hmaa tlan tur an nih avangin inrintawkna a nei sang viau bawk.
Season liam ta khan Yamaha-in Honda an tluk lo va, Lorenzo chuan a title humhim zo lovin a pumpuiah pahnihna a ni a, Honda tana season khat a hmannaah Stoner a champion. Kuminah pawh Honda bike tha hret tura ngaih a nih laiin, season tannaah Yamaha khalhtu Lorenzo a chak ber a, Yamaha aiin kum kal ta aiin hma an sawn hret a, kuminah Honda nen an inel nasa lehzual tura ngaih a ni.
An tlan lehna tur Jerez-ah hian Lorenzo a tlan tha thei viau a, 2006 leh 2007 khan 250cc huanga a tel laiin kum zawnin pakhatna a ni. MotoGP a luhchilh hnuah 2010 leh 2011-ah Spaniard hi Spanish tlankawngah a chak zawn leh bawk.
Lorenzo chuan : "250cc-ah vawi hnih he hmunah hian ka chak tawh a, MotoGP-ah vawi hnih bawk, Jerez hi tlankawng zinga ka ngainat ber pakhat a ni a, a kawng awm dan hi ka bike khalh thiam dan nen a inmil em em," tiin Lorenzo chuan a sawi.
Stoner chuan : "Tun pathianni hian result tha tak kan beisei a, kan tlan hnuhnun ber atang khan a chhe zawng ni lovin a tha zawkin beiseina tam tak kan neih belh a, tlankawng zinga ka chet thatna hmun ni lo mah se season inbuatsaihna kan hman lai khan ka che tha a, inrintawkna sang tak ka nei a ni," a ti.
Honda leh Yamaha team tha pahnih el zo lo mah se, Ducati chuan Qatar aia chet that an inring viau bawk. 2006 world champion Nicky Hayden chuan a teammate Valentino Rossi aiin Qatar-ah result a nei tha a, nikum khan Jerez-ah dawhsan luah phakin tunhnaia rim taka hna an thawh avangin hma an sawn ngei tur thu a sawi.
Season liam ta atang khan vawi sarih MotoGP title la tawh Rossi chuan Ducati bike a khalh a, a la talbuai char char. Qatar-ah 10-na a ni hram a, Italian rider hian Jerez-ah chuan chak taka a bike a khalh theih a ring a, nal taka Ducati khalh tura la insiam rem tawk lo Rossi hian Jerez an inpuahchahna milin tun tuma an bike hi an siam a, chu vangin pathianniah chuan chak zawka bike a khalh theih a inbeisei.
Qatar-a che chhe tak Lorenzo teammate Ben Spies pawhin result tha a neih phak ngei a ring a, vawiina an intlansiak tur hi season kal chho zela rider tha tur hriltu ber tura ngaih a nih avangin a pawimawh viau a, tlai dar 5:30 atangin an intlansiak ang.