@Ni 25.5.2012 zan khan Helipad-ah hun an hmang.
@An Asst Secretary Tv. Lalrinngheta chuan MFA referee exam-ah 3rd class referee a pass a, an lawmpui hle.
@An member Jerry Lalrinvara chuan Ni 26.5.2012 khan nupui a nei a, an lawmpui hle.
@Chanmari West branch football team chu an champion ngei an duhsak hle.
@AIR-a Folk Song an record-na hlawh Rs 8015/- lak tawh a ni.
CYMA NEWS
@ Ni 12.5.2012 khan CEC Meeting neih a ni.
@ YMA Day hman dan tur sawiho a ni a, kumin YMA Day 15th June, 2012 chu uar taka hman nise, heng a hnuaia mite hnenah hian hetiang hian tanpuina pek nise an ti. 1. Krista Hnungzuitu Tawngtai Bethel Camping Centre - Rs. 30,000/- 2. Hermon Children Home - Rs. 10,000/-. YMA Day denchhena Car Flag zawh dil Branch 4 Khatla, Tuithiang, Chanmari, Tuikual 'S' te chu remtih a ni bawk.
@ CEC Meeting hian Branch dingthar 3 an pawmpui a, chungte chu - 1) State Veng Branch YMA, Vairengte 2) Teltlang Branch YMA, Hailakandi 3) Luipui Branch YMA, Cachar te an ni a, Sialsuk Branch chu Branch 2 a inthen an dilna pawh pawmpui a ni.
@Ni 24.5.2012 khan HPC 'D' ten Branch YMA an thiah chungchangah Sub-Hqrs. YMA OB, HPC 'D' Demand Area chhunga Group OB, Branch OB pahnih leh Aizawl Khawpui chhung Branch President te Central YMA Hall-ah inkoh khawm a ni a, hetah hian mi 138 an kal khawm. Thuchhuak siam a ni.
Hmuhnawm thin lo mah se en a chakawm tho thin
-T-a
“He kawng hi chu aw... An inlehpel thei bawk si lo; tihdanglam dan a awm lo emaw ni chu le ? An inzui ringawt a, a hmuhnawm loh,” tiin U Nunthara leh Ka Pa Mawiaten kum tinin an sawi a, en an thulh chuang lo va, mi dangte pawhin he ngaihdan hi an thlawp hle. Mahse, Formula One tlankawng zinga an ngaihhlut em em a ni si.
Kumin hian Monaco Grand Prix hian kum dang aiin ngaihven a hlawh lehzual a, a chhan chu F1 chanchina thil thleng ngai lo thleng tura beiseina sang tak a awm vang a ni.
Monte Carlo kawtthlerah khawvela car chak ber an intlansiak thin a, 1950-a F1 kalpui a nih atangin Monaco tlankawng hi hman tan a ni tawh. A chep a, bang a hnaih a, kawi a tam bakah kual ulh em em a awm tel a, chak taka tlanna tur ngil thui a awm mang lo. Driver thiamna tak tak a lan chianna hmun tiin an sawi thin.
Khawvela nawmchenna hmunpui pakhat a ni a, mi lar rual tawm khawmna a ni bawk a, a khawpui a mawiin tuipui kama rem taka inhung a ni a, tlankawng chhehvel boruakin nasa takin mipui a hip a, driver-ten nuam an ti a, chak ber nih an chak lehzual.
Kumin hian vawi nga an tlan tawh a, driver hrang hlirin hnehna an la chang a, 1983 hnua season tanna tlankawng pangaa driver-ten pakhatna an inchan sem leh hmasak ber niin vawi khat aia tam chak ber ni thei an la awm lo. Chumai bakah, driver chauh ni lovin team hrang pangain hnehna an chang tawh a, heti ang hi thil vang a ni.
Kum kal ta khan tun ang hunah hian Red Bull khalhtu Sebastian Vettel chuan hma a hruai fal hman hle tawh; mahse, kuminah chuan tun thlengin champion tur a la chiang lo em em. Monaco-ah hian Lotus an beisei a, anni hi pakhatna an nih chuan F1 chanchina a vawi khat nan season tanna intlansiak parukah driver hrang thiau, team hrang vekin chak ber nihna an lauh dawn a ni.
Lotus a nih loh pawhin McLaren driver Lewis Hamilton chu rin kai a ni a, ani hi a tlan chak ber a nih chuan driver hrang parukin season tanna tlan rukah hnehna an chang dawn tho va, 2008 world champion Hamilton pawhin he kawng hi pakhatna nih a chakna ber a ni tih a pha lo.
Kumina vawi nga qualifying an tlan tawh zinga pathumah Hamilton a chak ber a, mahse, 2012 chhungin eng tlankawngah mah hnehna a la chang lo. Monaco hi inlehpelh harsatna a nih avangin qualifying a pawimawh a, 2009 atangin a hmasa ber atanga tlan chhuakten hnehna an la chang ziah a, tun kum hnih chhungin Red Bull chak ve vein, nikumah Vettel, 2010-ah Mark Webber a tlan chak ber.
Lotus emaw Hamilton emaw an chak lo a nih pawhin, kumina pakhatna la ni miah lo Webber emaw Michael Schumacher-te chu chak thei tur zinga ngaih an la ni cheu a, F1 chanchina thil thar a thleng lovang tih a sawi theih loh.
Vawiin tlai dar 5:30 atangin an tan dawn a, en loh a har leh ngawt ang.